Кунде «Алавес»га қарши ўйинга қадар сафга қайтиши мумкин
«Барселона» ҳимоячиси Жюль Кунде жароҳатидан тикланиб, шанба куни «Алавес»га қарши ўйинда майдонга тушиши мумкин.
«Барселона» ҳимоячиси Жюль Кунденинг Испания чемпионати 11-туридан ўрин олган «Алавес»га қарши учрашувда иштирок этиш имконияти юқори. Учрашув келаси шанба куни бўлиб ўтади.
Sport нашри хабар беришича, француз футболчисининг чап тўпиғи боғламлари чўзилиши сабабли олган жароҳатидан тикланиш жараёни муваффақиятли кечмоқда. Аввалроқ ушбу жароҳат туфайли Кунде Мадриднинг «Реал» клубига қарши баҳсни (1:2) ўтказиб юборган эди.
Кунде ижтимоий тармоқлар орқали мухлисларга мурожаат қилиб, уларни бирдамликка чақирди.
«Бу оғир ҳафта бўлди. Ҳозир ҳар қачонгидан ҳам кўпроқ бирдам бўлишимиз керак, “Барселона” мухлислари. Бу даврдан янада кучли бўлиб чиқишимизга шубҳа йўқ», — деб ёзди футболчи.
Жароҳат олган футболчилар сони кўплиги сабабли «Барселона» бош мураббийи Ҳанси Фликнинг таркиб танлаш имкониятлари тобора чекланмоқда. Германиялик мутахассис асосий жамоада захира жамоаси футболчиларини ҳам жалб этиш имкониятини истисно қилмаяпти.
Изоҳлар (0)