"Ювентус" клубида бахтли эмасдек кўринаётган Криштиану Роналду шу ёздаёқ фаолиятини бошқа жамоа сафида давом эттирмоқчи. Бу ҳақда "L'Équipe" нашри хабар тарқатди.

Роналду "Манчестер Сити" аъзосига айланиши мумкин. Буни шахсан футболчининг ўзи истамоқда. Чемпионлар Лигаси ғолиблиги учун асосий даъвогар сафида Криштиану 6-бор "олтин тўп" совринини ютишни мақсад қилган. У аввал ҳам АПЛда ўйнаган бўлиб, "Манчестер Юнайтед" шарафини ҳимоя қилган.

Шунингдек, португалиялик ҳужумчи "шаҳарликлар" сафида ҳаракат қилаётган ҳамюртлари Рубен Диаш, Жоау Канселу каби футболчилар билан жамоа ички муҳити борасида суҳбат олиб борган. Ўз навбатида, "Сити" ҳам КриРони харид қилишга қарши эмас. Харри Кейн "Тоттенхэм"дан олиб келинмаса, Роналду трансфери энг маъқул вариантга айланади. Маълумот учун, Англияда ёзги трансфер ойнаси 1 сентябрь санасига қадар давом этади.

36 ёшли футболчининг "Ювентус" билан амалдаги шартномаси 2022 йилга қадар мўлжалланган. Унинг трансфери 45 миллион еврога баҳоланмоқда.