Лапорта ҳакамликдан норози: УЕФА раҳбарига шахсан ўзи қўнғироқ қилди

"Барселона" президенти Жоан Лапорта Чемпионлар лигаси чорак финалида "Атлетико"га қарши баҳслардаги ҳакамлик юзасидан УЕФА раҳбари Александер Чеферинга тўғридан-тўғри қўнғироқ қилган.

Бу ҳақда "Mundo Deportivo" нашри хабар берди.

Манбага кўра, Лапорта суҳбат давомида ҳакамлар ишидан қаттиқ норозилигини билдирган.

Шунингдек, "Метрополитано"даги жавоб учрашуви танаффусида у УЕФА бош котиби Теодор Теодоридис ва унинг ўринбосари Жоржо Маркетти билан ҳам учрашган.

Лапорта уларга биринчи бўлимда бош ҳакам Клеман Тюрпен қабул қилган қарорлардан шикоят қилган. Айниқса, Дани Ольмога нисбатан белгиланмаган пенальти ва Хуан Муссонинг Фермин Лопесга қарши ҳаракати алоҳида таъкидланган.

Бундан ташқари, каталонияликлар раҳбари биринчи учрашувда ишлаган Иштван Ковачнинг ҳакамлигини ҳам танқид қилган.

Шу билан бирга, Лапорта УЕФА мутасаддиларини "Барселона" томонидан Марк Пубиль ўз жарима майдонида тўпга қўл теккизгани бўйича киритилган расмий норозиликни қабул қилинмас деб топгани учун ҳам кескин танқид қилди.