Лазизбек Мулложонов жаҳон чемпионатида Хулио Сезар Лакруз билан жанги, спаррингдаги жароҳати ва Олимпиадада иштироки бўйича режалари ҳақида гапирди (интервью)
Хабарингиз бор, Тошкент шаҳрида бўлиб ўтган бокс бўйича жаҳон чемпионатида -92 кг вазнда иштирок этган ҳамюртимиз Лазизбек Мулложонов бронза медалини қўлга киритган эди. Эътиборли томони, у чорак финалда кубалик афсонавий боксчи Хулио Сезар Лакрузни мағлубиятга учратиб, сенсация қайд этган.
SPORTS.uz сайти журналисти боксчи билан боғланиб, жаҳон чемпионатидаги таассуротлар ва келажакдаги режалар ҳақида суҳбат олиб борди.
- Катталар ўртасида жаҳон чемпионатида ўзингиз учун янги вазн тоифасида иштирок этдингиз. Бу қийинчилик туғдирмадими?
- Катталар ўртасидаги жаҳон чемпионатида мен учун янги вазн, янги боксчилар, янги рақиблар билан бўлди. Айниқса, улар супер оғир вазндан кўра тезроқ. Ундан ҳам кўра, жаҳон чемпионати 14 кун давом этган бўлса, ўша вазнни 2 ҳафта давомида ушлаб туриш бироз муаммо туғдирди. Лекин Худога шукр, Худо куч-қувват бериб, 3-ўринни олдик.
-Ўша чемпионатда анчагина кучли рақиб - Хулио Сезар Лакрузни мағлуб этдингиз. Ўзингиз бундай бўлишини кутганмидингиз?
- Қуръа натижалари чиққанида қарасам, чорак финалда энг асосий рақиблардан бири бўлган Лакруз билан тўғри келадиган бўлибман. Эсласангиз, ўтган жаҳон чемпионатида ҳам чорак финалдан қайтган эдим. Сўнгра ўзимга ўзим, наҳотки яна чорак финалдан тўхтасам... йўқ бу сафар бундай бўлмайди, деб мотивация бердим. Аллоҳдан сўраб бор кучимни ишлатдим. Худога шукрки, жанг ўзимиз ўйлаганимиздек бўлди. Ўзи боксчи қандайдир сезади. Жангдан олдин кўнглим хотиржам эди. Мураббийимга ҳам, дадамга ҳам Худо хоҳласа ғалаба қозонаман, деб айтган эдим. Ҳаммани ҳам ютиш мумкин. Муҳими, ўзингизга бўлган ишонч ва Аллоҳдан сўраб, рингга чиқиш керак.
- Ярим финалдаги Муслим Гажимагомедовдан учралган мағлубиятда сизга нима етишмади, деб ўйлайсиз?
- Ярим финалдаги мағлубиятим жуда катта фарқ билан бўлди, деб ҳам ўйламайман. 3-раунд ҳисоб очган вақтда раунд учун 5:0 берганда ҳам ғалаба биз томонда бўлар эди, лекин насиба шу экан. Нима етишмади деганда, мен Лакрузни ютганимдан сўнг, қолаверса рақибимнинг оёғида жароҳат борлигини эшитганимдан кейин, уни жангга чиқмаслиги мумкин деб ўйлаб, қандайдир хотиржамликка берилиб, жиддий қарамаганимдан, деб биламан.
- Яқинда Бокс федерациясида мини турнир бўлиб ўтди ва унда +92 кгда жанг қилдингиз. Кейинчалик ҳам шу вазнда қолмоқчимисиз ёки яна -92 кгда вазн тушасизми?
- Тўғри, яқинда текширув спарринглари бўлиб ўтди. Мини турнирда иштирок этишим оз вақт қолганда аниқ бўлиб қолди. Шунинг учун, мураббийлар билан маслаҳатлашган ҳолда, +92 кгда қатнашишга қарор қилдик. Чунки -92 кгга вазн қилишимга 1 ярим, 2 ой вақт кетяпти. Қолаверса, спаррингга ҳам вазн қилиб, 2 ойдан кейин Осиё ўйинларига ҳам вазн тушуриш мен учун қийинчилик туғдирар эди. Шунинг учун, спаррингга +92 кгда чиқдим.
- Ўша мини турнирда Мадияр Саидраҳимовга қарши жангда жароҳат олдингиз. Бу жиддий эмасми? Ҳозирда ҳолатингиз қандай?
- Ҳа, шу мини турнирда жароҳат олдим. 3-раунд охирида қошим йиртилиб кетди. Якунда мени қўлим кўтарилди, аммо кейинги босқичда давом эттира олмаслигим сабабли турнирни Мадияр Саидраҳимов давом эттирди. Баҳсда мен ғалаба қозондим, аммо жароҳатдан тикланиш учун, мураббийлар билан келишган ҳолда давом эттирмадим.
- Осиё ўйинлари Олимпиада йўлланмасини беради. Унда иштирок этишни режалаштиряпсизми?
- Худо хоҳласа, албатта имкон берилса Олимпиадага йўлланма берувчи Осиё ўйинларида -92 кгда ҳаракат қиламиз.
Жалол Ахмедов суҳбатлашди.
Фикрлар