Легионеримиз ўзига жой танлади!

Футбол бўйича Россия Премьер-лигасини кузатиб бораётган ўзбекистонлик футбол ишқибозлари бундан буён Мокванинг ЦСКА жамоасига ҳам мухлислик қилади.

“Пахтакор” ва Ўзбекистон миллий терма жамоаси ҳужумкор футболчиси Аббосбек Файзуллаев фаолиятида илк бор легионер мақомини олди ва энди москвалик армиячилар шарафини ҳимоя қилади.

Ҳар икки клуб 19 ёшли футболчининг трансферини расман эълон қилди.

Аббосбек Файзуллаевнинг ўзи ЦСКА матбуот хизматига биринчи интервьюсини бериб, майдонда қайси позицияларда ўйнай олишини ва имконият берилса, жамоа олдинги чизиғида ҳужумчи ролида тўп тепишни исташини айтиб ўтди.

- Менга 10-рақам позициясида ўйнаш кўпроқ ёқади. Шунингдек, ўнг ва чап қанот ҳужумчиси сифатида ҳам ўйнай оламан.

Мен ЦСКАнинг энг муҳим ўйинчиларидан бўлишни истайман ва бу жамоага барча совринларни ютишда ёрдам беришни ният қилганман.

Ҳали ҳеч ким билан дўстлашиб улгурганим йўқ, лекин Бахани (Бахтиёр Зайнутдинов) танийман. Тезроқ жамоадошларим билан дўстлашиб кетишни истайман, - деди москваликларнинг янги легионери Аббосбек Файзуллаев.

Аббосбек Файзуллаев “Пахтакор” академиясида тарбияланган ва 2021 йилнинг бошида асосий таркибга қабул қилинган. Таъкидлаш жозки, Аббосбек Файзуллаев бир неча позицияда ўйнай оладиган ҳужумкор футболчи ҳисобланади. У  икки мавсумдан бери “Пахтакор” жамоасининг асосий таркибида ўйнаб келаётган эди.

19 ёшли ўйинчи клублар миқёсида Ўзбекистон чемпионатида жами 33 та учрашувда майдонга тушиб, рақиблар дарвозасини етти маротаба ишғол қилган ва жамоадошларига учта голли пас узатган.

Шунингдек, Файзуллаев Осиё Чемпионлар лигасида бешта ўйинда ўз ҳисобига битта гол расмийлаштириб қўйди.

Иқтидорли футболчи Ўзбекистон кубоги мусобақасида учта баҳсда икки марта дарвоза тўрини аниқ нишонга олди.

Истеъдодли футболчи 2023 йил давомида 20 ёшгача бўлган футболчилар ўртасидаги Осиё ва жаҳон чемпионатларида ўз иқтидори ва салоҳиятини намойиш қила олганидан кейин унинг харидорлари кўпайиб кетди.

Аббосбек Файзуллаев Тошкентда ўтказилган ёшлар ўртасидаги Осиё чемпионатида ғолиб чиқди ва мусобақанинг энг яхши ўйинчиси сифатида эътироф этилди. Шунингдек, терма жамоамизнинг Аргентина мезбонлик қилган жаҳон чемпионатидаги ўйинларида ўз иқтидори ва салоҳиятини намойиш қилди.

У ёш бўлишига қарамай, Ўзбекистон миллий терма жамоасига ҳам жалб этила бошлади ва учта учрашувда майдонга тушиб, битта тўп ҳам киритди.

Маълумотларга кўра, Аббосбек Файзуллаевнинг “Пахтакор” билан амалдаги шартномаси 2025 йилнинг охиригача имзолангани боис, Тошкент клуби бу трансфердан 500 минг евро ишлаб олди.

ЦСКА раҳбарияти ўзбекистонлик легионер биоан 2026 йилнинг ёзигача шартнома тузди. Томонлар келишувга кўра¸ҳамкорликни яна бир йил узайтириш имконияти бор.

Мутахассисларнинг таъкидлашича, ўзбек футболчиси яқинда асосий рақиб – Москванинг “Спартак” жамоасига ўтиб кетган ҳужумкор футболчи Хесус Мединанинг ўрнини босиши кутилмоқда.

Шунингдек, ЦСКА раҳбарияти Аббосбек Файзуллаев келганидан кейин колумбиялик легионер Йорг Карраскалдан ҳам қутилишни режалаштирмоқда.

“Ланс” режаси ўзгарди: Ҳусановга аталган жойда энди бошқа ҳимоячи ўйнайди

Бу ерда Шомуродов ҳақида яхши гаплар бўляпти

Машҳур мураббий Шомуродовга баҳо берди

Файзуллаевнинг ЦСКАга трансферига нима халақит қиляпти?

“Кальяри” мухлислари Шомуродов дебюти ҳақида нималар деяпти?

“Кальяри” етакчи футболчиси Шомуродов ҳақида нима деди?

Премьер-лига клуби тез орада ўзбек футболчиси трансферини эълон қилади

ЦСКА мазза қилади: Файзуллаевнинг кучли томони кўп, камчилиги эса...