“Ланс” режаси ўзгарди: Ҳусановга аталган жойда энди бошқа ҳимоячи ўйнайди

“Ланс” раҳбарияти Ўзбекистон терма жамоаси марказий ҳимоячиси Абдуқодир Ҳусановни мудофаа маркази етакчиси Кевин Дансога ўринбосар сифатида трансфер қилган эди.

Франция вице-чемпиони 24 ёшли австриялик ҳимоячини Италия чемпиони – “Наполи”га сотиб юборишни ва ўрнига ўзбекистонлик футболчини тайёрлашни режалаштирган эди.

“Наполи” мутасаддилари Кевин Дансони олишга уриниб кўрди. “Наполи” мураббийлар штаби Дансони “Бавария”га ўтиб кетган осиёлик футболчи Ким Мин Джэга муносиб ўринбосар сифатида жамоага олиб келишни истаяпти.

Италияликлар “Ланс” раҳбариятига бу футболчи учун 22 миллион евро бадал пули кўрсатилган расмий таклифни ҳам юборди.

Бироқ, “Ланс” ўз ўйинчисини 30 миллион еврога баҳолади. Улар “Наполи”нинг навбатдаги таклифини кутаётган эди.

Энди вазият ўзгарди. “Ланс” мураббийлар штаби асосий ҳимоячиларидан бирини жамоада олиб қолишга қарор қилди. Томонлар ўзаро музокараларда бир қарорга келди.

Кевин Дансо клуб билан шартномани 2027 йилнинг ёзигача узайтирди ва ҳамкорлик расмийлаштирилди.

Кевин Дансо Англиянинг “Рединг”, “МК Донс” ва Германиянинг “Аугсбург” жамоалари тарбияланувчиси ҳисобланади. Профессионал фаолиятини 2017 йили “Аугсбург”да бошлаган. Кейинчалик Англиянинг “Саутгемптон” ва Германиянинг “Фартуна” клубларида ижара асосида тўп тепган.

Австриялик ўйинчи “Ланс” сафига 2021 йили Германиянинг “Аугсбург” жамоасидан трансфер қилинган эди.  Кевин ўтган мавсум барча турнирларда 40 маротаба майдонга тушиб, ҳимоядаги вазифаларини уддалашдан ташқари, рақиблар дарвозасини бир марта ишғол қилди ва жамоадошларига учта голли пас узатди.

Энди Абдуқодир Ҳусанов асосий таркибга кириши учун Кевин Дансо билан рақобатлашишига тўғри келади. “Ланс” мураббийлар штаби “Вольфсбург” ва “Торино” жамоаларига қарши ўтказилган иккита ўртоқлик учрашувида ўзбекистонлик легионерини сўнгги дақиқаларда захирадан майдонга туширди.

Эслатиб ўтамиз, Абдуқодир Ҳусанов Франция чемпионатига йўл олган биринчи ўзбек футболчиси ҳисобланади. Бундан ташқари, “Энергетик-БГУ”да ўйнаган легионеримиз Беларусь чемпионатидан Европанинг кучли бешлик чемпионатлари совриндори бўлган клубга тўғридан-тўғри кўчиб ўтган ягона футболчига айланди.

Абдуқодир Беларусга 2021 йили февралда ҳали 17 ёшлигидаёқ келган эди. Беларусь футболидаги қоидага кўра, 18 ёшга тўлмаган легионер футболчи профессионал лигада рўйхатдан ўтказилмайди. Бунинг ягона йўли – истисно тариқасида ФИФАдан рухсат олиш эди. Бироқ, клубнинг ҳам, агентнинг ҳам бу борадаги ҳаракатлари самара бермади. Халқаро ташкилотдан рухсат келгани йўқ.

2022 йили Абдуқодир 18 ёшгача тўлиши билан “Энергетик-БГУ” раҳбарияти “Бунёдкор” тарбияланувчисини Беларусь чемпионатида иштирок этиши учун рўйхатдан ўтказди.

Беларусь чемпионатидаги бир ярим йиллик фаолиятидан кейин Ҳусанов энди Европанинг топ-чемпионатида ўйнайдиган бўляпти.

Бу ерда Шомуродов ҳақида яхши гаплар бўляпти

Шомуродов портлашини кутяпман!

Машҳур мураббий Шомуродовга баҳо берди

Файзуллаевнинг ЦСКАга трансферига нима халақит қиляпти?

“Кальяри” мухлислари Шомуродов дебюти ҳақида нималар деяпти?

“Кальяри” етакчи футболчиси Шомуродов ҳақида нима деди?

Премьер-лига клуби тез орада ўзбек футболчиси трансферини эълон қилади

ЦСКА мазза қилади: Файзуллаевнинг кучли томони кўп, камчилиги эса...