Легионерларимизга ишонч камаймоқдами?

“Хўжанд” клубида уч нафар легионеримиз – Маъмур Икромов, Сирож Ҳамроев ҳамда Санжар Рихсибоев тўп сураётганини биласиз. Аммо охирги пайтларда ҳамюртларимиз етарлича ўйин амалиётига эга бўлишяпти, деб айта олмаймиз.

Тожикистон чемпионатининг 14-турида “Хўжанд” “Истаравшан”ни 2:1 ҳисобида мағлуб этди. Ушбу учрашувда эса Икромов билан Ҳамроев захирада қолдирилди. Рихсибоев эса иккинчи бўлим ўрталарида майдонга тушди.

Ўтган турда “Хўжанд” “Файзканд”ни 2:0 ҳисобида таслим қилган учрашувда ҳам легионерларимиз захирада қолдирилганди. Бунга сабаб сифатида 12-турда “Истиқлол”га қарши ўйинни айтиш мумкин. Ўша учрашувда “Хўжанд” 0:4 ҳисобида мағлубията учраганди. Афсуски, ўша ўйиндан бери ҳамюртларимиз захирада қолиб кетмоқда. Легионерларимиз эса, бош мураббий Ҳаким Фузайловнинг яна ишонч билдиришини кутмоқда.