Лекин бизга гол урмасин! Ўзбекистонлик футболчи Мессини эмас, Роналдуни танлади

Ўзбекистон миллий терма жамоасининг собиқ ҳимоячиси Виталий Денисов Аргентина терма жамоаси юлдузи Лионель Месси ва Португалия терма жамоаси етакчиси Криштиану Роналду ўртасидаги кўп йиллик баҳс ҳақида фикр билдирди.

- Месси — ҳақиқий феномен. Месси ва Роналду каби футболчилар юз йилда бир марта дунёга келади. Лекин уларнинг ўзаро рақобатида менинг симпатиям кўпроқ Криштиану томонида.

Албатта, унинг Ўзбекистон терма жамоаси дарвозасига гол урганини кўргим келмайди (кулгуси). Лекин холис қарасак, мен уни қўллаб-қувватлайман. Месси ҳам, Роналду ҳам бу жаҳон чемпионатида яна гол уришга улгуришади, — дея Денисовнинг сўзларини Metaratings келтиради.

Жаҳон чемпионати гуруҳ босқичи 2-турида Австрияга қарши ўйинда (2:0) Месси дубль қайд этиб, мусобақа тарихидаги энг яхши тўпурарга айланди. Унинг жаҳон чемпионатларидаги голлари сони 18 тага етди. Шу тариқа, аргентиналик футболчи Германия терма жамоасининг собиқ ҳужумчиси Мирослав Клозени ортда қолдирди. Клозенинг ҳисобида жаҳон чемпионатларида 16 та гол бор эди.

Криштиану Роналду эса ҳали жорий жаҳон чемпионатидаги голлари ҳисобини очгани йўқ. Умуман олганда, португалиялик ҳужумчи жаҳон чемпионатларида 23 ўйинда майдонга тушиб, саккизта гол урган ва икки марта голли пас берган. 

2-тур доирасида Португалия терма жамоаси Ўзбекистон билан тўқнаш келади. Учрашув 23 июнь куни Тошкент вақти билан соат 22:00 да бошланади.