Лэмпард "Челси"нинг АПЛ чемпионлигини қўлга киритиш имконияти ҳақида гапирди

"Челси" бош мураббийи Фрэнк Лэмпард жамоасининг премьер-лигада ғолиб чиқиш имкониятлари ҳақида гапириб ўтди.

“Кўпчилик бу мавсумда соврин қўлга киритиш учун яхши ҳаракат қилаётганимизни айтяпти. Аммо биз ўтган йилги “Ливерпуль” ёки икки йил олдинги “Манчестер Сити” эмасмиз. Улар шунчаки майдонга тушиб, ғалаба қозонарди. Улар буни мунтазам амалга оширган.

Бир мавсумда жамоа шакллантириш қийин, футболчилар буни яхши тушунади. Аммо улар бизнинг қай томонга қараб кетаётганимизни билади. Бу эса уларнинг ишончини янада оширади ва қийинчиликларни енгиб ўтишда ёрдам беради.

Бундай ҳолат “Челси”да аввал ҳам бўлган. Абрамович жамоани эндигина сотиб олган пайтларида биз АПЛда тўлиқ ўзимизни кўрсата олмаганмиз. Аммо кейинги мавсумда биз ўзимизда кучни ҳис қила бошлаганмиз”, - деди Лэмпард.

“Аристократлар” айни дамда 22 очко билан АПЛ мусобақа жадвалида 8-ўринда бормоқда.