Леонинг 11 метрлик нуқтадан берган зарбаларини бартараф этиш борасида "лайфхак"!

SPORTS.uz ПСЖ жамоаси аъзоси Лионель Мессининг пенальтидан йўллаган зарбалари борасидаги қизиқарли маълумотлар билан ўртоқлашади.

Париж супер клуби "Реал"га қарши биринчи ўйинда йирикроқ ҳисобда ғалаба қозониши мумкин эди. Баъзи вазиятларда Куртуа фантастик ўйин кўрсатган бўлса, айрим ҳолларда омад ПСЖга кулиб боқмади. Иккинчи бўлим ўртасида эса, Мбаппе ишлаган пенальтини Месси амалга оширди. 7 карра "Олтин тўп" соҳиби ўзидан ўнг томонга кучсизроқ зарба йўллади. Бельгиялик посбон дарвозаси олдидаги хавфни бартараф этди. Қўшиб берилган дақиқалардагина Килиан Мбаппе катта саҳнага чиқиб, жамоасига минимал ҳисобдаги ғалабани тақдим этди.

Бу борада у Роналдудан ёмонроқ натижа қайд этган!

Куртуа билан дуэлдаги омадсизликни қўшиб ҳисобласак, Месси профессионал фаолияти давомида 30 бор пенальтидан гол ура олмаган. Сўнгги бор у 2021 йилнинг 2 май санасида "Валенсия" дарвозасини ишғол этишни уддалай олмаган эди. Силлессен чап томонга йўллаган кучсизроқ зарбани муаммосиз олиб чиққан, якунда бу эпизод ўйин тақдирига таъсир қилганди. Энг қизиғи шундаки, 2021 йилда Месси Кейлор Навас қўриқлаётган дарвозага ҳам "Барса" сафида гол кирита олмаган.

Умуман олганда, 11 метрлик нуқтадан йўлланган зарбалар Мессининг кучли томони эмас, аммо аргентиналик ҳужумчи уни амалга оширишда давом этмоқда. Ҳозирча 103 бор у нишонга аниқ "урди". Умумий ҳисобда зарбаларининг 22,5 фоизи голга айланмаган. Солиштириш учун Криштиану Роналдунинг статистикасига эътибор қаратамиз. "Криш" 172 бор тўп ёнига келган ва уларнинг 143 таси гол билан якунланган. Португалиялик уринишларининг 16,8 фоизини йўққа чиқарган. Фарқни сезган бўлсангиз керак.

Шунингдек, Лео ўзи истамаган ҳолда ЕЧЛ антирекордини такрорлади. У 5 марта футболдаги энг қулай стандарт вазиятни голга айлантира олмади. Худди у сингари Тьерри Анри ҳам бу кўрсаткич борасида мақтана олмайди. Буниси муҳим эмас. Асосийси, у фаолияти давомида илк бор "Реал" дарвозасини пенальтидан ишғол эта олмади. "Барселона" либосида у бу ишни 6 бор муваффақиятли амалга оширган. Бу вазиятга қаҳрамонимизнинг муносабати қандай?

"Тўғриси, ҳайронман. Терма жамоа ёки клубим сафида 11 метрдан фойдалана олмаганимда афсусланаман. Доимий пенальти тепувчи бўлганим боис рақиб дарвозабонлари мени техникамни ўрганади."

Мессининг зарбасини қандай бартараф этиш мумкин? Дарвозабонлар тавсия қилади!

Шу кунга қадар сайёрамизнинг энг кучли футболчисини доғда қолдирган дарвозабонлар вазиятга ойдинлик киритишга уриниб кўради. Биз уларнинг фикрларидан иқтибосларни эътиборингизга ҳавола этамиз:

Тибо Куртуа - зарбани қўли билан қайтарган.

"Дарвозабонлар учун Мессига қарши ўйнаш осон эмас. Унинг техникасини яхшилаб ўргандим ва уни чалғитишга уриндим. Афсуски, бу ишнинг ўзи камлик қилади. Асосий фактор барибир омад!"

Кейлор Навас - зарбани оёқлари билан қайтарган.

"Аслида, Мессини қаерга зарба йўллашини олдиндан билишнинг имкони йўқ. У 100 бор бу ишни амалга оширган. Негадир, ўша сонияда зарбани мен кутган томонга йўллашини сездим. Ҳаммаси кўнгилдагидек тугади".

Ханнес Тоур Халльдоурссон - исландиялик посбон 2018 йилги ЖЧда Аргентина сардорининг зарбасини ҳаводаги сейв эвазига бартараф этган.

"Дарвозабонлар Мессининг қандай пенальти тепиши борасида турли видео дарслар олади. Гап шундаки, у ҳар сафар турли нуқталарни нишонга олади. Бу сафар мени омадим келди. Агар бир сония кеч қолганимда, тўп дарвоза тўридан жой олган бўлар эди".

Горка Ираисос - ўнг пастги бурчакдан тўпни олиб чиққан.

"Мессининг зарбаси бошқа футболчиларникидан ажралиб турмайди. Барчаси интуицияга боғлиқ. Бугун шу омил менга қўл келди".

Жефферсон - ўнг томонга йўлланган кучсиз зарбани чизиқдан олиб чиққан:

"Леони қандай зарба йўллашини ўрганиб чиққанман. Уни зарба йўллашини охиригача кутдим. Кейин сакрадим. Шу тариқа, унга мени алдаши учун имкон бермадим. Месси ўзининг 100 фоиз имкониятини ишга солди, бироқ танлаган стратегиям иш берди".

Бундан чиқди, биз 7 бор "олтин тўп"ни ўзиники қилиб олган Мессининг пенальтидан йўллаган зарбаларини посбонлар бартараф этиши учун формула яратсак бўлар экан-да?! Бунинг учун 3 та қоидага риоя қилиш шарт!

• Сўнгги сониягача кутиш;
• Яхши интуицияга эга бўлиш;
• Куртуа сингари Мессининг асабига тегиш.

Мана тайёр формула! Энди барча замонлардаги энг яхши футболчи - Лео Мессини дуэлда таслим этиш имконияти сизда бор. Албатта, бу ҳазил. Шунга қарамай, ҳар қандай ҳазил тагида 10 фоиз ҳақиқат яширин бўлади.

Бу масалада "Эспаньол" кипери Диего Лопес сайёрамиздаги энг кучли мутахассис. У нақд 2 бор Леони дуэлда мағлубиятга учратган. Биринчи бор 2008 йилда "Вильярреал" сафида бу трюкни амалга оширган бўлса, орадан 10 йил ўтиб, "Эспаньол"да уни такрорлаган. Яқинда "Марcа" нашрига берган интервьюсида, унга бундай ютуқнинг сири нимада эканлиги ҳақида савол берилди. Лопес эса, сезганингиздек, бу сирни фош этишни истамади. Балки у Мессиниг 2 та пенальтисини йўққа чиқарган сайёрамизнинг ягона дарвозабони сифатида тарихда қолишни истагандир. Яна ким билади дейсиз?!

Я . У