Лиэм Росеньор: "Футболда тўғри ёки нотўғри услуб йўқ"

"Челси" бош мураббийи Лиэм Росеньор Арне Слотнинг Англия Премьер-лигасида стандарт вазиятлар орқали урилган голлар ҳақидаги фикрларига муносабат билдирди.

Аввалроқ "Ливерпуль" устози Арне Слот жамоалар стандарт ҳолатларга ортиқча таянаётгани сабабли Премьер-лига ўйинларидан завқ олмаётганини айтган эди.

"Менимча, бу футболнинг гўзаллиги — голни турли усулларда уриш мумкин. Мен учун ўйиннинг тўғри ёки нотўғри йўли йўқ. Кеча бурчак зарбасидан гол урганимизда мухлисларимизга унинг қандай кўринишда бўлгани фарқ қилмади, деб ўйлайман. “Арсенал” мухлислари учун ҳам жамоасининг голлари қандай кўринишда бўлгани муҳим эмас эди. Энг муҳими — ғалаба қозониш.

Бурчак зарбалари ҳақида айтсам, мавсум якунида жамоалар дарвозабонларга қандай таъсир ўтказаётгани ва ҳимояда қандай жойлашганини таҳлил қилиш керак, деб ўйлайман. Назаримда, бу айрим жамоаларга ноҳақ устунлик бермоқда", — деди Росеньор.