"Ливерпуль" Сенегалнинг мундиалдаги тўпурарини сотиб олмоқчи

«Ливерпул» Сенегал терма жамоаси ва «Кристал Пэлас»нинг ярим ҳужумчиси Исмаилу Саррга жиддий қизиқиш билдирмоқда. Мерсисайд клуби 28 ёшли вингер учун курашда «Галатасарай» билан рақобат қилиши мумкин. Туркия клуби бош мураббийи футболчини ўз жамоасида кўришни қатъий истаяётгани айтилмоқда. Бу ҳақда журналист Невзат Диндар ижтимоий тармоқдаги саҳифасида хабар берди.

Манбага кўра, «Кристал Пэлас» клуби ҳозирча Саррни сотиш ниятида эмас. Бироқ футболчининг ўзи жамоани тарк этишни хоҳлаётгани қайд этилмоқда.

Исмаилу Сарр 2026 йилги жаҳон чемпионатида Сенегал терма жамоасининг энг самарали ўйинчисига айланди. У тўрт ўйинда майдонга тушиб, тўртта гол урди.

Ўтган мавсумда Сарр «Кристал Пэлас» сафида барча мусобақалар ҳисобга олинганда 45 та ўйинда иштирок этди. У шу давр мобайнида 21 та гол уриб, икки бор ҳамкасбларига голли пас берди. Футболчининг клуб билан амалдаги шартномаси 2029 йил ёзигача мўлжалланган. Transfermarkt портали маълумотларига кўра, Саррнинг бозор қиймати 45 миллион еврони ташкил этади.