“Ливерпуль” АПЛнинг энг зўр икки ҳимоячисини олмоқчи

Англиянинг амалдаги чемпиони “Ливерпуль” биринчи даврадаги инқироздан кейин таркибини жиддий тарзда ўзгартиришга қарор қилди ва бу борада олинадиган ўйинчиларни танлай бошлади. 

Инсайдер Жеймс Уотленд маълумотларига кўра, “қизиллар” Англия чемпионатининг энг кучли ҳимоячиларидан икки нафарини нишонга олган. Мерсисайдликлар “Тоттенхэм”дан Микки ван де Вен ва “Манчестер Сити”дан Йошко Гвардиолни олмоқчи.

Премьер-лигада энг тез югурадиган нидерландиялик футболчини “Ливерпуль” ёзда қўлга киритишни мўлжаллаган. Гвардиол трансфери масаласи эса, бироз вақт талаб этади. Хорватиялик универсал ҳимоячининг “Манчестер Сити” билан амалдаги шартномаси якунланишига ҳали яна икки йил бор. 

Микки ван де Вен 2023 йилнинг ёзида “Вольфсбург”дан “Тоттенхэм”га 40 миллион евро эвазига ўтган. Бу мавсумда у 27 та ўйинда иштирок этиб, ҳимоядаги вазифаларини бажаришдан ташқари, 6 та гол урди ва 1 та голли узатма берди.

Йошко Гвардиол эса 2023 йили “Лейпциг”дан “Манчестер Сити”га 90 миллион еврога кўчиб ўтган. Жорий мавсумда у 23 та учрашувда майдонга тушиб, 2 та гол ва 5 та голли узатма қайд этган.