“Ливерпуль” атиги 13 дақиқага яраган юлдуздан воз кечди

“Ливерпуль” раҳбарияти катта умидлар билан “Ювентус” ярим ҳимоячиси Артурни мавсум охирига қадар ижарага олганди.

Ливерпулликлар бош мураббийи Юрген Клопп бразилиялик футболчи у қўллайдиган ўйин услубига тўла мос тушишини таъкидлаганди.

Лекин охир-оқибат Англия жамоаси бу ўйинчининг трансфер ҳуқуқини сотиб олмасликка қарор қилди.

“Ливерпуль” Артурнинг трансферини сотиб олмайди. Бу савдо суммаси 44 миллион еврога баҳоланганди. Артурнинг энг катта муаммоси – жароҳатлар. Улар жуда кўп. Қизиғи, “Ливерпуль” раҳбарияти жамоада жароҳатланганлар кўпайиб кетгани учун уларнинг ўрнини тўлдириш мақсадида трансферларнинг охирги куни Артурни олиб келганди, деб ёзди таниқли журналист Фабрицио Романо.

26 ёшли футболчи “Ливерпуль” сафида Чемпионлар лигасида “Наполи”га қарши 13 дақиқа ўйнаганидан кейин умуман майдонга туширилмади.