“Ливерпуль” етакчисига “Сити”дан учралган мағлубият алам қилди

 “Ливерпуль” ярим ҳимоячиси Доминик Собослаи Англия кубоги чорак финалида “Манчестер Сити”дан 0:4 ҳисобида учралган йирик мағлубиятдан сўнг фикр билдирди.

- Агар сен бирор иш қилсанг ва бу натижа бермаса — бунда маъно йўқ. Бизда имкониятлар бўлди, лекин улардан фойдаланмадик, устига-устак оддий пенальтига йўл қўйдик. Оқибатда — 0:4.

Биз бунчалик кўп гол ўтказиб юборишга ҳаққимиз йўқ. Бу ерда қўшадиган гап ҳам деярли йўқ.

“Этихад” стадионида ҳар доим ғалаба қозониш қийин. “Сити” билан ўйинда 0:1 ҳисобида ҳали ишонч сақланиб туради. Аммо 0:2 — бу аллақачон бизнинг хатомиз: биринчи бўлимнинг энг охирида гол ўтказиб юбориб танаффусга чиқиш мумкин эмас. Шундан кейин имкониятлар янада камаяди.

Иккинчи бўлимда сен ўйинни ўзгартириш ниятида майдонга чиқасан, лекин дарҳол учинчи голни ўтказиб юборасан — ва шунда ҳаммаси тугайди, қайтиб келиш деярли имконсиз бўлади.

Бизга характер етмади, руҳий барқарорлик етмади. Ростини айтсам, ҳеч ким ўзининг максимал даражасини кўрсата олмади. Ҳозир оғир давр, лекин биз биргаликда туришимиз шарт, — деди Собослаи Sky Sports нашрига берган интервьюсида.

Эслатиб ўтамиз, Англия чемпионатида “Ливерпуль” бешинчи ўринда бормоқда ва бу мавсум чемпионлик унвонини ушлаб қола олмайди.