"Ливерпуль" ҳужумчиси Саудия клубининг таклифига рози бўлди

"Ливерпуль" ҳужумчиси Дарвин Нунес Саудия Арабистонининг "Ал-Ҳилол" клубининг таклифига ижобий жавоб қайтарди. Бу ҳақда журналист Руди Галетти хабар бермоқда.

Манбага кўра, 26 ёшли футболчи "Ал-Ҳилол" билан шахсий шартнома шартлари бўйича оғзаки келишувга эришган. Энди Саудия Арабистони жамоаси Нунес учун катта пул олмоқчи бўлган "Ливерпуль" билан келишиб олиши керак. Миш-мишларга ишонадиган бўлсак, мерсисайдликларни 70 миллион евролик таклиф қаноатлантириши мумкин.

Нунес ўтган мавсумда барча мусобақаларда 47 та ўйинда майдонга тушиб, 7 марта рақиблар дарвозасини ишғол қилди ва 7 та ассистни ўз ҳисобига ёздириб қўйди.