“Ливерпуль” катта трансфердан воз кечди

Англиянинг деярли барча гранд клублари “Вест Хэм” юлдузи Деклан Райс учун курашмоқда. “Ливерпуль” биринчи бўлиб бу пойгадан чиқди.

Football Insider нашрининг хабар беришича, ливерпулликлар бош мураббийи Юрген Клопп маҳоратли ярим ҳимоячининг катта мухлиси бўлса-да, клуб раҳбарияти ўта қиммат нарх қўйилган ўйинчини трансфер қилиш фикридан қайтди.

Маълумки, “Вест Хэм” хўжайинлари таянч ярим ҳимоячисини бир неча мавсумдан бери унга катта бадал пули қўйган ҳолда ўз сафида сақлаб қолмоқда. Бу гал улар харидорлардан 180 миллион евро талаб қилмоқда.

Табиийки, бу нарх нафақат “Ливерпуль” балки бошқа харидорлар – “Манчестер Юнайтед” ва “Челси”ни ҳам чўчитмоқда. Деклан Райснинг ўзи анчадан бери клуб мутасаддиларидан кетиш учун рухсат ололмаяпти.