"Ливерпуль" Муҳаммад Салоҳга "Бавария"дан ўринбосар топди

"Ливерпуль" жамоани тарк этиши аниқ бўлиб улгурган Муҳаммад Салоҳ ўрнига "Бавария" футболчиси Лерой Санени олиб келиши мумкин. 
 
Хабарингиз бор, мисрлик футболчи бир неча кун олдин мавсум сўнггида жамоани тарк этишини расман эълон қилди. Шу сабабли, клуб раҳбарлари янги қанот ҳужумчиси излашни бошлаб юборишган. 
 
"Fichajes" нашрининг маълумотига кўра, германиялик Сане мерсесайдликлар учун энг яхши вариант сифатида кўрилмоқда. Манбанинг ёзишича, 28 ёшли ҳужумчи ҳам жорий мавсум немислар клуби таркибидаги ўйин амалиётидан норози. Шу боис, қишки трансферлар ойнасида ёки мавсум сўнггида жамоани тарк этиб, яна Англия Премьер-лигасига қайтиш ҳақида ўйламоқда. 
 
Лерой 2016 йилдан 2020 йилгача Хосеп Гвардиолар бошчилигидаги "Манчестер Сити" таркибида ҳаракат қилган. Шундан сўнг эса 80 миллион евро эвазига Германиянинг "Бавария" клубига кўчиб ўтган эди. 
 
Маълумот ўрнида, Сане 5 мавсум немислар сафида 194 та учрашувда иштирок этиб, 53 та гол ва 51 та голли узатмага муаллифлик қилган.