“Ливерпуль” олти футболчидан воз кечди

Англиянинг амалдаги чемпиони “Ливерпуль” жорий мавсумдан кейин таркибида жиддий ўзгаришларга қўл уришга қарор қилди.

Daily Mail нашрининг ёзишича, ёзги трансферлар ойнаси вақтида жамоа раҳбарияти бир гуруҳ ўйинчилар билан хайрлашишга тайёргарлик кўрмоқда.

Манба маълумотига кўра, мерсисайдликлар сафидан оммавий кетиш ҳужумчи Муҳаммал Салоҳдан бошланиши кутилмоқда. Экспертлар фикрига кўра, мисрлик тўпурар жамоадаги ўз ҳолатидан норози.

Салоҳдан ташқари, “Ливерпуль” тажрибали ҳимоячи Эндрю Робертсоннинг келажаги масаласини ҳам муҳокама қилмоқда, унинг шартномаси келаси ёзда тугайди. Бу ўйинчига ўринбосар қидириш ишлари бошлаб юборилган.

Марказий ҳимоячи Иброҳим  Конатенинг келажаги ҳам ноаниқ. “Қизиллар” футболчига апрель бошигача янги шартнома ҳақида ўйлаб кўриш учун вақт берган.

“Ливерпуль” жамоада икки мавсум давомида бош мураббий Арне Слот ишончини қозона олмаган вингер Федерико Кьеза бўйича таклифларни кўриб чиқади.

Клуб шунингдек, ярим ҳимоячи Кёртис Жонс трансферини ҳам ўртага қўймоқда. Гарчи Арне Слот унга ишонч билдираётган юўлса, клуб раҳбарияти унинг нархи баландлигидан фойдаланиб, ғазнага мўмай тушум қилмоқчи.

Ҳимоячи Жозеф Гомеснинг келажаги кўп жиҳатдан Конатенинг “Ливерпуль”даги ҳолатига боғлиқ. Футболчига берилаётган ўйин вақти ёқмаяпти ва у ҳам бошқа клубларга очиқ эканини таъкидламоқда.