"Ливерпуль" Салоҳ ўрнига "Брайтон" ҳужумчисини асосий номзодлар қаторига қўшди

"Ливерпуль" ёзги трансферлар ойнаси олдидан Муҳаммад Салоҳ ўрнини тўлдириш учун янги вариантларни кўриб чиқмоқда. "Daily Mail" хабарига кўра, мерсисайдликлар рўйхатига "Брайтон" қанот ҳужумчиси Янкуба Минтех ҳам киритилган.

Аввалроқ Салоҳ мавсум якунлангач клубни тарк этишини тасдиқлаган эди. Шу боис "қизиллар" ўнг қанот учун муносиб ўринбосар қидиришни бошлаган ва Минтех потенциал асосий мақсадлардан бири сифатида кўрилмоқда.

Манбага кўра, "Брайтон" 2024 йилда футболчи учун "Ньюкасл"га тўланган 33 миллион фунтлик маблағни камида икки баробарга оширишни режалаштирмоқда.

Қизиғи шундаки, "Ливерпуль" бош мураббийи Арне Слот футболчи билан аввал "Фейеноорд"да бирга ишлаган. Энди нидерландиялик мутахассис уни "Энфилд"га олиб келиш орқали яна ҳамкорликни тиклаши мумкин.

Хабарда айтилишича, клуб бошқа вариантларни ҳам кузатмоқда. Улар орасида "РБ Лейпциг" вакили Ян Диоманде, "Ювентус" футболчиси Франсиску Консейсау ҳамда "Хоффенхайм" қанот ўйинчиси Базумана Туре номлари тилга олинган.