“Ливерпуль” супертрансфер учун қанча тикиши ҳал бўлди

“Ливерпуль” раҳбарияти жамоа таркибини кучайтириш учун “Ньюкасл”дан Александр Исаакни олиш учун сўнгги таклифини тайёрламоқда.

Гарчи Англия чемпионлари швед футболчисини олиш фикрида собит турган бўлса-да, бу трансфер учун ортиқча даражада кўп пул сарфламоқчи эмас.

“Ньюкасл” яқинда ливерпулликларнинг 110 миллион фунт стерлинг миқдоридаги таклифини қабул қилмади. “Қарғалар” ўз ўйинчисини 150 миллион фунт стерлингга баҳолаяпти. Клуб бу нархни Исаакни таркибда сақлаб қолиш мақсадида харидорларни чўчитиш учун айтгани таъкидланди.

Журналист Бен Жейкобснинг ёзишича, “Ливерпуль” раҳбарияти “Ньюкасл” белгилаган нархини тўламоқчи эмас, чунки бу қадар  катта миқдордаги харажат клубнинг келажаги ва умуман олганда трансфер бозорига салбий таъсир ўтказади, деб ҳисоблаяпти.

Барча омилларни инобатга олган мерсисайдликлар Исаак трансфери учун 120 миллион фунт стерлинг тўлашга тайёр ва ундан ортиқ сумма ажратмасликка қарор қилган.

Шунга қарамай, “Ньюкасл”нинг бу таклифга муносабати мавҳумлигича қолмоқда. Александр Исаакнинг ўзи клуб раҳбарияти унинг йўлини тўсаётганидан норози.