“Ливерпуль” ва “Манчестер Сити” “Байер” футболчисини талашмоқда

Англиянинг “Ливерпуль” ва “Манчестер Сити” клублари “Байер”нинг ўнг қанот ҳимоячиси ҳисобланган Жереми Фримпонг учун курашмоқда. 
 
Хабарингиз бор, мерсесайдликларнинг қанот ҳимоячиси ҳисобланган Трент Александр-Арнольд ёзги трансферлар ойнасида “Реал Мадрид”га ўтиши мумкин. “Шаҳарликлар”нинг асосий ҳимоячиси Кайл Уокер эса ижара асосида Италиянинг “Милан” клубига кўчиб ўтди. Шу боис, икки клуб ҳам трансферлар ойнасида нидерландиялик футболчи учун кураш олиб бормоқчи. 
 
“Teamtalk” нашрининг маълумотига кўра, ҳозирда Англиянинг икки жамоаси футболчи учун энг асосий даъвогар ҳисобланади. Агарда германияликлар ҳимоячи учун таклифларни кўриб чиқмоқчи бўлса, Арне Слот ва Хосеп Гвардиола бошчилигидаги клуб шартнома таклиф қилишга тайёр. 
 
Маълумот ўрнида, 24 ёшли фулбек жорий мавсум 34 та беллашувда иштирок этиб, 3 та гол ва 10 та голли узатмага муаллифлик қилган. Унинг клуб билан шартномаси 2028 йилгача мўлжалланган бўлиб, Тransfermarkt порталидаги нархи 50 миллион евро деб баҳоланмоқда.