"Локомотив" 6 нафар футболчи билан хайрлашди

Ушбу мавсум ниҳоясига етиб, "Локомотив" жамоаси вакиллари ҳам қишки таътилга чиққанидан хабарингиз бор. Ҳозирги пайтда "темирйўлчилар" мураббийлар штаби янги мавсумга тайёргарлик режаси устида иш олиб бормоқда.

Албатта, мавсумлар оралиғида ҳар бир клубда таркиб билан боғлиқ ўзгаришлар рўй беради. Жамоалар баъзи футболчилар билан хайрлашиб, улар ўрнини бошқа ўйинчилар билан тўлдиради. Бугун "Локомотив" ПФК олти нафар футболчи билан дўстона, илиқ тарзда хайрлашди.

Булар - дарвозабон Жавоҳир Илёсов, ҳимоячилар - Шуҳрат Муҳаммадиев, Хуршид Мухторов, ярим ҳимоячилар - Садриддин Абдуллаев, Жавоҳир Сидиқов ҳамда ҳужумчи Марат Бикмаев.

Жамоадаги ушбу ўзгаришлар ҳақида "Локомотив" ПФК бош директор ўринбосари Тўлабек Акрамов шундай деди:

- "Авваламбор клубимизни тарк этган футболчиларга ўз миннатдорчилигимни билдираман. Гарчи бу мавсум Суперлигада 7-ўринни қўлга киритган бўлсак-да, жамоадаги барча бор кучи билан меҳнат қилиб, юқори ўринлар учун охиригача кураш олиб бордик. Фақат баъзи ўйинлардаги омадсизлик ва бошқа сабаблар туфайли очко йўқотдик".

- "Ҳа, бугун асосий таркибнинг олти нафар футболчиси билан хайрлашдик. Бу футболчиларнинг ҳар бирига клуб ривожига ўз ҳиссасини қўшгани учун раҳмат айтиб қоламан. Лекин эндиликда бошқа йўлдан боришни мақсад қилганмиз. Ўйлайманки, У-21 жамоамиздан бир нечта футболчи асосий таркибда ўйнашга тайёр. Шу боис келаси йил кўпроқ ёшларга ва ўз тарбияланувчиларимизга эътибор бериш ҳақида бош қотиряпмиз. Янги мавсум жамоамиз таркибида бир қанча ёшлар тўп тепади, биз эса уларга катта футболда ўз ўринларини топиб кетишда қўлдан келганча ёрдам берамиз. "Локомотив"да таркиб ўзгаргани билан мақсад ва вазифалар ўзгармайди".

"Локомотив" матбуот хизмати.