"Локомотив" бош мураббийи Россия клубида тажриба оширяпти

“Локомотив” клуби бош мураббийи сифатида ишлаётган Денис Коростиченко айни пайтда Россияда бўлиб турибди.

Гап шундаки, у Россия премьер-лигаси қатнашчиларидан бири – “Химки” клубида мураббийлик амалиётини ўтамоқда. Шунингдек, у билан бирга яна бир ўзбекистонлик мураббий Ислом Исмоилов ҳам “Химки” жамоасида тажриба оширмоқда. Шуни айтиш лозимки, "Химки" жамоасини Сергей Юран бошқаряпти ва мураббийларимиз ушбу мутахассис билан ҳам учрашишди.

Уларнинг ушбу сафари 21-28 март кунларини ўз ичига олади. Коростиченко ушуб сафари хусусида Sports.uz сайтига қуйидагиларни айтди:

“Ҳаммаси жуда қизиқ. Бу ерда ўрганадиганларим бор. Биласизми, яхши мураббийларнинг ўз клубларини қандай тайёрлаётганини томоша қилиш ҳар доим қизиқ ва биз учун муҳим. Тез орада про лицензияси учун ўқишнинг 5-модули бошланади. Бизнинг олдимизда хориж клубида амалиёт ўташ вазифаси турганди. Шунинг учун ҳам “Химки” клубида амалиёт ўтаяпмиз.

Кейин ЦСКАнинг академиясига бораман ва уларнинг қандай ишлашини ҳам кўрмоқчиман”, - деди “Локо” устози.