"Локомотив" клуби янги ҳомийга эга бўлди

Ўз олдига доим юқори мақсадларни қўядиган “Локомотив” профессионал футбол клуби 15 апрель куни юртимиздаги энг йирик компаниялардан бири BMB Trade Group билан титул ҳомийлик шартномасини имзолади.

2017 йилнинг 4 апрель санасида ташкил этилган ушбу компания ўтган 5 йил мобайнида Республикамиз ҳамда халқаро миқёсида жуда катта ютуқларга эришгани кўпчиликка маълум. Компания раҳбарияти “Локомотив” стадионига ташриф буюриб, футбол клуби раҳбарияти билан учрашди.

Тадбир икки қисмдан иборат бўлди. Тадбирнинг биринчи қисмида ҳар икки ташкилот раҳбарияти музокаралар столида шартнома имзолашдан мақсад ва шартнома шартларини келишиб олишди. Тадбирнинг иккинчи қисми “Локомотив” анжуманлар залида давом эттирилиб, бунда ОАВ ходимлари ва мухлислар кўз ўнгида шартномага имзо чекиш тадбири ўтказилди.

Тадбирда сўз олган “Локомотив” ПФК бош директори ўринбосари Тўлабек Акрамов шундай деди:

“Футбол клубимиз ташкил этилганидан бери доим ўз олдимизга юқори мақсадларни қўйиб келяпмиз. Сўнгги йилларда футбол маркетинги соҳасида ҳам катта қадам ташладик. Бугундан бошлаб BMB Trade Group компаниясининг “Локомотив” ПФК титул ҳомийсига айлангани клубимиз фаолиятида муҳим аҳамият касб этади. Ўйлайманки, ҳозирча бир йилга тузилган ҳомийлик шартномаси фақат шу билан тўхтаб қолмайди. Биз BMB Trade Group билан узоқ муддатли ҳамкорлик олиб боришга ҳаракат қиламиз”.

Тимул ҳомийлик шартномасини имзолаш маросимида BMB-Opera Zafferano Ўзбекистон-Италия қўшма корхонаси бош директори Азиз Маматқулов ва “Локомотив” ПФК бош директори ўринбосари Тўлабек Акрамов иштирок этдилар.

BMB Trade Group компанияси ва “Локомотив” профессионал футбол клуби ўртасидаги ҳамкорлик янги имкониятларни очиб, шунингдек, клубнинг футбол анъаналарини янада ривожлантиришга хизмат қилади.

“Локомотив” матбуот хизмати.