"Lokomotiv" klubiga vaqtinchalik bosh murabbiy tayinlandi

Kuni kecha "Lokomotiv" klubi bosh murabbiy Andrey Fyodorovni iste’foga chiqarganini ma’lum qilgandi. Bugun "temiryo‘lchilar" bosh murabbiyligini vaqtinchalik bajaruvchi etib U-21 jamoasi bosh murabbiyi Dilshod Nuraliev tayinlandi.

"Kecha “Lokomotiv” PFK rahbariyati qaroriga ko‘ra, asosiy jamoamiz bosh murabbiyi Andrey Fyodorov iste’foga chiqarilganini xabar bergandik. Bugun rahbariyat futbolchilar bilan uchrashib, shu paytgacha “Lokomotiv” U-21 jamoasini boshqarib kelgan Dilshod Nuraliev asosiy tarkib bilan ishlashini ma’lum qildi.
Bugundan Dilshod Jo‘raevich “Lokomotiv” bosh murabbiyi vazifasini bajaruvchi lavozimida ish olib boradi. Olmaliq shahridagi OKMK stadionida bo‘lib o‘tadigan “Lokomotiv” - “Qo‘qon-1912” bahsida “temiryo‘lchilar”ni malakali murabbiy, bir necha o‘nlab shogirdlar ustozi Dilshod Nuraliev boshqaradi. Bugungi o‘yinda jamoamizga omad tilab qolamiz!", - deyiladi rasmiy axborotda.