“Локомотив” ПФК бош директор ўринбосари Тўлабек Акрамовнинг байрам табриги
Ads

Қадрли футбол мухлислари, “Локомотив” футбол клубининг азиз ишқибозлари!

Мана сиз-у бизга жуда кўплаб қувончли онлар, ажойиб ғалабалар ва завқли лаҳзалар тақдим этган 2016 йил ҳам секин-аста ниҳоялаб, ўз ўрнини янги – 2017 йилга бўшатиб беришга ҳозирланмоқда. Ортда қолаётган мазкур йил сиз билан бизнинг хотирамизда энг омадли даврлардан бири сифатида мухрланиб қолишига шубхам йўқ!

Зеро 2016 йилда “Локомотив” футбол клуби ўз олдига қўйган деярли барча вазифани аъло даражада уддалай олди. Жамоамиз ўз тарихида илк бор (узоқ кутилган)Ўзбекистон чемпиони деган унвонга эга чиқди. Қолаверса, “Локомотив” Ўзбекистон кубогида ҳам зафар қучишга муваффақ бўлди. Осиё Чемпионлар Лигасида эса жамоамиз гуруҳ босқичидан муваффақиятли тарзда чиқиб, чорак финалга қадар етиб боришни уддалади. Бир мавсумда 2 та соврин қўлга киритилганини яхши натижа дея баҳолаш мумкин, назаримда.

Лекин сиз – азиз ишқибозларимиз жамоамиздан фақат ва фақат ғалабалар кутишингизни жуда яхши биламиз. Шу боисдан янги келаётган 2017 йилда ҳам жамоамиз ишқибозларини улкан ютуқ ва зафарлар билан хушнуд этишни мақсад қиляпмиз.

Жамоамиз секин-асталик билан ўз инфратузилмасини яхшилаб бормоқда. Йилдан-йилга натижаларимиз ҳам янада яхшироқ кўриниш олмоқда. Бу темпни кейинги йилларда ҳам сақлаб қолишга ва “Локомотив” брендининг янада оммалашишига ҳаракат қиламиз. Умид қиламанки, 2017 йилда янада улкан зафарлар сиз-у бизга ёр бўлади!

Шу ўринда бутун Ўзбекистон халқини, футболимиз жамоатчилиги вакиллари ва кўп сонли “Миллионлар ўйини”нинг ашаддий ишқибозларини Янги Йил байрами билан чин дилдан муборакбод этаман ва барчангизга янги йилда сиҳат-саломатлик, бахт-омад ва оилангизга қут-барака тилайман!..

 

Тўлабек Акрамов

“Локомотив” ПФК бош директор ўринбосари