"Локомотив" расман Диёр Туропов билан хайрлашди ва "Навбаҳор"га ўтганини эълон қилди

Маълумки, “Локомотив” клубининг иқтидорли ярим ҳимоячиси Диёр Туропов жамоасини ўзгартирди. Эндиликда “Локо” ушбу футболчининг кетганини расман тасдиқлади. Клуб матбуот хизмати бу борада қуйидагича хабар қилди:

“Диёр Туроповга барчаси учун раҳмат!

2017 йилдан бери “Локомотив” шарафини ҳимоя қилиб келган ярим ҳимоячи Диёр Туропов жамоамиз сафини тарк этди.

Ёзги трансфер ойнасида Диёр Туропов “Локо”дан “Навбаҳор”га ўтгани ҳақида мухлислар хабар топиб улгурган бўлса керак.

Диёр Туропов 2017 йилнинг 5 январь куни “Локомотив” билан шартнома имзолаганди. Ўтган беш ярим йил ичида ўз ўйини билан “темирйўлчилар” меҳрини қозона олди ва жамоамизнинг етакчи футболчиларидан бирига айланди.

Диёржон Туропов “Локо”даги давр мобайнида Ўзбекистон миллий чемпионати доирасида 111 та баҳсда майдонга тушишга муваффақ бўлди. Шунингдек, Ўзбекистон Кубоги мусобақаси билан Осиё Чемпионлар лигасида ҳам жамоамизга яқиндан ёрдам берди. Эндиликда Туропов фаолиятини бошқа клубда давом эттиради.

“Локомотив” ПФК беш ярим йиллик ҳамкорлик учун Диёржон Туроповга миннатдорчилик билдиради ҳамда ярим ҳимоячининг кейинги фаолиятида омад тилайди".

Диёр Туропов "Локомотив"ни тарк этиши ҳақида: "Совринли ўринлар учун курашадиган жамоага ўтишга қарор қилдим"