Лукаку – энг расво трансфер!

Ҳозирда шарҳловчилик қилаётган венесуэлалик собиқ футболчи Алехандро Морено жорий мавсумнинг энг расво трансфери ҳақида фикр билдирди.

Жорий мавсум олдидан Ромелу Лукаку энг шов-шувли трансфер бўлди. Бельгиялик футболчидан “Челси”да ҳам клубга келгунича қилган ишларни амалга ошириш талаб этиларди. Унга жуда катта ишонч билдирилди. Энг шов-шувли харид қисқа муддатда энг омадсиз трансферга айланди.

“Челси” Ромелу келганида  “Энди ўз тўпураримиз бор. Кай Хаверц ва Тимо Вернерга суяниб қолмаймиз, ҳаммасини ўзимиз ҳал қила оламиз!”, деб жар солган эди, - деди Алехандро Морено.

Ёзда Италия чемпиони “Интер”дан 97,5 миллион фунт эвазига трансфер қилинган Ромелу Лукаку “Челси” сафида барча турнирларда 24 та учрашув ўтказиб, саккизта гол ва иккита голли пас муаллифи бўлди.