Лукаку бирибир “Челси”дан кетади!

“Челси” ҳужумчиси Ромелу Лукаку жамоадошларига клубдан кетишга қарор қилганини маълим қилди, деб хабар бермоқда, Испаниянинг AS нашри.

Манбанинг таъкидлашича, 28 ёшли бельгиялик футболчи “Интер”га қайтиб бормоқчи.

Хабарингиз бор, “Челси” раҳбарияти бош мураббий Томас Тухель истаги билан ўтган ёзда Лукакуни 97,5 миллион фунт эвазига трансфер қилган эди. Италия чемпионатида тўпурарлик қобилиятини намойиш қилиб келган ҳужумчи Англия премьер-лигасига ўтганидан кейин гол уришни  унитиб қўйди.

Бир неча ой муқаддам Лукаку “Челси”даги аҳволидан норози экани ва жамоадан кетиши ҳақида интервью бергани анчагина можароларга сабаб бўлганди. Кейинроқ узрини сўраган Ромелу барибир фикридан қайтмаган кўринади.

“Интер” бу ҳужумчини қайтариш учун катта сумма тўлашга тайёр эмас. Томонлар ўзаро келишувга эришган тақдирда миланликлар Лукакуни ижарага олиши мумкин бўлади холос.

Лукаку жорий мавсумда барча турнирларда 34 та учрашувда қатнашиб, рақиблар дарвозасига 12 та тўп киритди ва иккита голли пас оширди. Солиштирадиган бўлсак, Ромелу ўтган мавсумда “Интер” сафида 44 та ўйинда 30 гол ва ўнта ассист муаллифи бўлган ва миланликларнинг 11 йиллик танаффусдан сўнг Италия чемпиони бўлишига ҳисса қўшганди.