Лукаку янги мавсумни қаерда ўтказиши бўйича бир қарорга келди

“Интер” ҳужумчиси Ромелу Лукаку мавсумлар оралиғида ўз иш жойини ўзгартирмоқчи эмас.

Бельгия терма жамоаси йиғинида бўлиб турган Лукаку Het Laatste Nieuws нашрига берган интервьюсида Антонио Контедан сўнг келадиган мураббий билан бирга “Интер”ни яна чемпион қилишга тайёрлигини айтган.

Якунланган 2020/21 йилги мавсумда Антонио Конте бошқарувидаги “Интер” А Серияда чемпионликни қўлга киритди. Италиялик мутахассис шундан сўнг ўз лавозимини тарк этди.

Бундан аввалроқ Лукаку ёзда “Челси”га ўтиши ҳақида хабарлар тарқалган эди.

Ромелу жорий мавсум Италия А Сериясида 36 та ўйинда иштирок этди. У ушбу учрашувларда 24 та гол урди ва 11 та голга ассистентлик қилди.