Лукас Пакета: "Кечиринг, мен ҳамиша ҳам идеал инсон бўла олмайман"

"Вест Хэм" ярим ҳимоячиси Лукас Пакета "Ливерпуль"га қарши учрашувдаги ўзининг майдондан четлатилиши ҳақида фикр билдирди. АПЛнинг 13-турида лондонликлар 0:2 ҳисобида мағлуб бўлди. Иккинчи тайм охирида Пакета ҳакам билан ортиқча баҳслашгани учун икки марта сариқ олиб, қизил карточкага дучор бўлди.

Пакета ўзига қаратилган танқидлар ва руҳий босим ҳақида шундай ёзди:

"Энди мени ёмон одам деб ўйлашини тушунаман. Ҳаётимда содир бўлган воқеалар ва руҳий соғлигим билан боғлиқ қийинчиликлардан кейин буни кўтариб яшаш осон эмас! Бундан буён бундай ҳолатлар менга янада кучли таъсир қилмаслиги учун ҳаракат қиламан. Бу менинг майдондан ҳайдалишимга баҳона эмас. Шунинг учун мухлислар ва жамоадошларимдан узр сўрайман", — деб ёзади футболчи.

Шунингдек, у "Sky Sports"нинг унинг хатти-ҳаракатини "аҳмоқона" дея таърифлаган мақоласига ҳам жавоб қайтарди:

"Аҳмоқона — бу икки йил давомида федерация томонидан ҳеч қандай руҳий ёрдам кўрсатилмаган ҳолда ҳаётинг ва карьерангга таъсир ўтказилиши. Балки менинг “аҳмоқона” деб аталган хатти-ҳаракатим — кечинмаларим ва бошимдан ўтганларнинг акс-садосидир. Ва, афсуски, мен яна чидаб яшашимга тўғри келади! Мен идеал эмасман, кечиринг", — деди Пакета.

Эслатиб ўтамиз, 2024 йилда Лукас Пакета ўйин натижасига таъсир кўрсатиб, қимор учун шартли ҳаракатлар қилганликда айбланган эди. 2025 йил июлида у тўлиқ оқланди.