Мадриднинг янги юлдузи-Мартин Эдегор ҳақида

  2014 йил декабр ойида футбол олами “Стремсгодсет” футболчиси Мартин Эдегор ҳақида эшитди. Айнан ўша пайтларда ёш ва истеъдодли футболчини “Реал Мадрид” ўз сафига қўшиб олди. 16 ёшли футболчига “қаймоқранглилар” 3 млн евро тўлади. Мадрид жамоаси учун жуда кичик пул бўлиши мумкин, аммо футболчининг ёшига қарайдиган бўлсак, яхшигина жиддий таклиф эди.

Кўпчилик у “Реал”ни танлаб хато қилди дея ҳисоблашди. Ўша пайтда унга таклиф билдирган “Аякс”га ўтганида ҳам ўйин амалиётига эга бўлар эди. “Аякс”, умуман Голландия жамоалари ёш футболчиларга етарлича амалиёт бериб, уларни ўсишига ёрдам беришади. Лекин Эдегор Испанияга кетишга қарор қилди. Буни сабабини тушунтириш осон. У ёшлигидан Криштиану Роналдунинг ашаддий мухлиси эди. Ҳеч бўлмаганда, машғулотларда ўз кумири билан бирга шуғулланиш насиб этишини ўйлаб, бундай имкониятни қўлдан чиқаришни истамади. Новегиялик футболчи “Реал” таклифини қабул қилди. Бунинг эвазига эса ўз футболчилик фаолиятини таваккал остига ташлади.

2015 йил 23 майда “Хетафе”га қарши Ла Лига ўйинида дебютини ўтказди. Унинг орзуси амалга ошди. Ўз кумири билан бирга тўп суриш насиб этди. Ўша ўйинда мадридликлар 7-3 ҳисобида ғалаба қозонди. Мартин “Реал” сафида майдонга тушган энг ёш футболчига айланди. Ўшанда у 16 ёш-у 156 кунлик эди. Келаси мавсумда эса бирорта ўйинда майдонга тушмади. Жамоа академияси бўлмиш “Кастиля”нинг асосий футболчисига айланди. Бу эса у Испания пойтахтини тарк этиши кераклиги ҳақида огоҳлантирув қўнғироғи эди.

“Стремсгодсет”ни тарк этганига 2 йил бўлган Мартин Эдегор Голландия томонга йўл олди. 2 йил аввал “Аякс” таклиф билдирган бўлса, бу сафар “Херенвен” футболчини ўз сафига қўшиб олишни истади. Бир пайтлар Клас-Ян Хунтелар ва Хаким Зиеш каби футболчиларни етказиб берган жамоага ижарага ўтди Мартин. Ижара муддати бир ярим йил бўлиб, шартномада унга асосий таркибдан ўрин кафолатаниши белгиланган эди.

“Херенвен”да Эдегорнинг ишлари юришмади. Мунтазам асосий таркибда тушишидан қатъий назар, ўтказган 40 та ўйинида 3 та гол ва 4 та голли узатма беришга муваффақ бўлди. Лекин ундаги иқтидорни Голландияда мутахассислар юқори баҳолади. “Реал” футболчи танлашда адашмаганини, у ҳали ўсишини таъкидлашди.

Ижара муддати тугагач, эдегор бир муддат “Реал”га қайтди. Бир ойдан сўнг эса яна Голландияга йўл олди. Бу сафар унинг жамоаси “Витесс” эди. “Витесс”да Эдегор россиялик мутахассис Леонид Слуцкий қўл остида тўп сура бошлади. Ўтказган 35 та ўйинида 9 та гол урди ва 12 марта жамоадошлари гол уришига ёрдамлашди. Бу эса “Витесс” таркибида бир мавсумда 10 дан зиёд ассистентликни амалга оширган иккинчи футболчи бўлишига ёрдам берди. Биринчи ўринда эса Милот Рашиц эди.

2018/2019 йилги мавсум эдегор учун фантастик тарзда ўтди. “Реал”нинг мухлислари ижтимоий тармоқларда раҳбарият футболчини ортга қайтаришини, асосий таркибдан жой олишига имконият беришини талаб қила бошлашди. Зидан эса Мартин ҳали бошқа жамоаларда ўсиши керак дея ҳисоблади. Бу сафар раҳбарият уни Ла Лига жамоасига ижарага беришни ўйлаб қолди.

“Реал Сосьедад” футболчини ижарага олди. У Ла Лигада худди аввалдан ўйнаб юргандек таассурот қолдира бошлади. Жамоага жуда тез мослашиб кетди. Испанияга биринчи келишида ёш бўлганлиги, уни устига гранд жамоада ўз ўрнини топа олмаслигини энди тушуниб етган Мартин “Сосьедад”да энди ўзини кўрсатишни бошлади. Бир пайтлар Мартин Голландия жамоаларига ижарага берилганида энди уни келажаги йўқ, у етиб келди дея ҳисоблаганлар, ҳозирда унинг ўйинларини олқишлаб кузатиб ўтиришибди. Унинг ҳозирги ўйинларини кўрганлар, Эдегорни Мессига ўхшатишмоқда. “Реал Сосьедад”нинг “Алавес”га қарши ўйинида (3-0) Эдегор Микел Оярсабал билан биргаликда рақиб ҳимоячиларини хатолар қилишга мажбур этишди ва жамоасининг йирик ҳисобда ғалаба қозонишига ёрдам беришди.

Ҳозирда Мартин Эдегор Whyscout рейтингига кўра энг яхши ҳужумкор ярим ҳимоячилар ичида иккинчи ўринда турибди. Биринчи ўринда эса “Атлетик”нинг 33 ёшли футболчиси Раул Гарсия турибди.

Мессининг даражасига етиши учун унинг олдида осон бўлмаган ва узоқ йўл кутиб турибди. Лекин Эдегор бу йўлни босиб ўтишга тайёр. 2016/2017 йил Ла Лига қила олмаган ишларини энди амалга оширяпти. Юқорида тилга олганимиз, “Алавес”га қарши ўйинда Мартин 10 марта жамоадошларига қуай вазиятларни яратиб бера олганди. Бундай сермаҳсулликни охирги марта Ла Лига Месси 2016 йил августда амалга оширган эди.

Мартин ҳозирда жуда яхши имкониятга эга бўляпти ва бу имконият унинг ўсишига ёрдам беради. Балки, келаси мавсум уни “Реал”нинг асосий таркибида кўрармиз, балки, Европанинг бошқа бир етакчи жамоаси унга асосий таркибдан жой ажратар. Муҳими, футболчи ҳозир бир пайтлар унга билдирилган ишонч бекорга эмаслигини исботлашда давом этяпти.