Мағлубиятдан кейин Гвардиола уч футболчининг “пўстагини қоқди”

Англиянинг амалдаги чемпиони “Манчестер Сити” еттинчи турга келиб илк мағлубиятини тан олди. “Вулверхэмптон” футболчилари “шаҳарликлар”ни 2:1 ҳисобида енгди.

Хосеп Гвардиола уч нафар шогирдини кескин танқид қилди. Бош мураббийга Матеус Нуньес, Матео Ковачич ва ўз дарвозасини ишғол қилиб қўйган Рубен Диаснинг ўйини ёқмади.

- Биз ўз вазиятларимиздан керакли даражада фойдалана олмадик. Рақиб мустаҳкам ҳимояланаётганида Ковачич ва Рубен рақибнинг марказий ҳимоячиларига ҳужум чилиши керак эди. Лекин улар бундай қилмади. Бунинг оқибатида бутун жамоа қийналди.

Нуньес фаол ўйнаши талаб этиларди, бўш ҳудудлардан унумлироқ фойдаланиш керак эди. Унинг ўрнига иккинчи бўлимда майдонга тушган Оскар Бобб  жуда яхши ҳаракат қилди, ташаббускорлик қобилиятини ишга солди, - деди Хосеп Гвардиола.