“Манчестер Сити” 150 миллион еврога зўр ҳужумчи олади

Франциялик ҳужумкор футболчи Майкл Олисе “Бавария” таркибида Бундеслигадаги ёрқин ўйинидан яна Англия Премьер-лигасида иштирок этиш имкониятига эга бўлмоқда.

Бу ҳақда инсайдер Экрем Конур ижтимоий тармоқлар орқали хабар берди.

Манбага кўра, қимматбаҳо футболчини “Челси” ва “Манчестер Сити” ўз сафига қўшиб олиш учун катта харажатга тайёрлигини билдирган. Иккала клуб ҳам Олисени ёзги трансфер ойнасида олиб келиш учун кураш олиб бормоқда.

“Бавария” француз футболчисини фақат 150 миллион евро таклиф қилинган тақдирдагина сотишга рози бўлади. Олисе немис гранди билан 2029 йил ўрталаригача шартнома тузган.

Олисе аслида “Челси” тарбияланувчиси ҳисобланади. “Аристократлар” уни асосий таркибга қабул қилмаган ва 2020 йили “Рединг” жамоасига қўйиб юборган. Бир йилдан кейин “Кристал Пэлас” иқтидорли ўйинчини 9,3 миллион еврога сотиб олди.

2024 йилнинг ёзида эса, “Бавария” Олисе учун “Кристал Пэлас”га 53 миллион евро тўлади. Бундеслига грандида Майклнинг ўйини очилиб кетди. Хусусан, жорий мавсумда 24 ёшли ўйинчи барча мусобақаларда 33 та учрашувда майдонга тушиб, 13 та гол ва 24 та ассист муаллифи бўлди.