"Манчестер Сити" Роналдуни текинга қўлга киритмоқчи

"Ювентус" ҳужумчиси Криштиану Роналду фаолиятини бошқа клуб сафида давом эттириши мумкинлиги кун мавзусига айланди. Унга асосий даъвогар "Манчестер Сити" бўлиб турибди.

Журналист Фабрицио Романонинг маълум қилишича, "шаҳарликлар" 36 ёшли футболчи трансферига Габриель Жезусни ҳам қўшмоқчи. Бу орқали клуб португалияликни текинга қўлга киритишни ният қилган.

Ўз навбатида, туринликлар ўз юлдузини 30 миллион евродан камига қўйиб юбормоқчи эмас. Унинг "кекса сеньора" билан амалдаги шартномаси 2022 йилнинг 30 июнь санасига қадар мўлжалланган. Роналдунинг агенти Жорже Мендеш айни пайтда Турин шаҳрида бўлиб турибди.

Аввалроқ, Криштиануга ПСЖ клубидан ҳам таклиф борлиги ҳақида хабарлар тарқалганди. У ўтган мавсум "Ювентус" сафида 44 учрашувда майдонга тушиб, ўз ҳисобига 36 гол ва 4 ассистни ёздириб қўйишга муваффақ бўлган.