"Манчестер Сити" Шомуродов билан ўйнаган футболчига қизиқяпти

«Манчестер Сити» жамоаси таркибини янгилаш доирасида «Рома» клуби ярим ҳимоячиси Ману Коне номзодини трансфер режасига киритди. Бу ҳақда Daily Mail нашри хабар берди.

25 ёшли француз футболчиси Родри ва Тиджани Рейндерс жамоани тарк этганидан сўнг, ярим ҳимояни мустаҳкамлаш учун асосий номзодлардан бири сифатида кўрилмоқда. Коне сўнгги икки мавсумдан буён «Рома» шарафини ҳимоя қилиб келмоқда. У Серия А доирасида 63 ўйин ўтказиб, 4 та гол урган. Шунингдек, 25 ёшли ярим ҳимоячининг Франция терма жамоаси сафида 19 та ўйини бор. Коне майдондаги ҳаракатчанлиги ва тўпсиз ўйиндаги самарали ҳаракатлари билан танилган.

Манба маълумотига кўра, «Рома» Коне учун тахминан 59 миллион евро атрофидаги таклифларни кўриб чиқишга тайёр. Аввалроқ футболчига «Манчестер Юнайтед» ва «Челси» клублари ҳам қизиқиш билдиргани хабар қилинган эди.