“Манчестер Сити” супертрансфер учун “кулгили” нарх таклиф қилди

“Манчестер Сити” раҳбарияти дарвозани қўриқлаш учун ПСЖ вакили Жанлуижи Доннаруммани олиб келиш бўйича музокараларни давом эттирмоқда.

Парижликлар италиялик голкипер билан хайрлашишга қарор қилган ва уни имкон қадар тезроқ сотиб юбормоқчи.

Асосий даъвогар ҳисобланган “Манчестер Сити” 26 ёшли посбон билан шахсий шартномани келишиб олган ва йилига 12 миллион евро миқдорида маош тўлашга рози.

“Шаҳарликлар” Доннарумманинг шартномаси тугашига бир йил қолгани ва бундан буён ПСЖга керак эмаслигини инобатга олиб, уни арзон нархга трансфер қилмоқчи.

Европа Чемпионлари лигасининг амалдаги ғолиби бўлган францияликлар 50 миллион еврога баҳоланган Доннаруммани  30-35 миллион еврога қўйиб юборишга тайёрлигини билдирган. Бироқ L'Équipe нашри журналисти Лоик Танзининг маълум қилигича, манчестерликлар Доннарумма трансфери учун парижликларга бор-йўғи 15 миллион евро таклиф қилди.

Агар ПСЖ бу суммани қабул қилмаса, “Манчестер Сити” вакиллари трансферни январга қолдиради ва дарвозабоннинг нархи янада пасайиши кутади.