“Манчестер Сити”ни яна бир юлдуз тарк этадиган бўляпти

“Манчестер Сити” раҳбарияти таркибни янгилаш ва ёшартириш сиёсатини олиб бораётгани боис, клубнинг ёши катта юлдузлари ўзига муносиб бошқа жамоа топиш ҳаракатини бошлаб юборган.

Клубни тарк этиши кутилаётган ўйинчилар орасида 29 ёшли Жек Грилиш ҳам. Англиялик ярим ҳимоячига Италия грандларидан “Наполи” жиддий қизиқш билдиряпти.

The Sun нашрининг ёзишича, ўйинчининг ўзи агар “Манчестер Сити” таркибни қайта шакллантириш жараёнида ундан воз кечишга қарор қилса, фаолиятини Англия Премьер-лигасидан ташқарида давом эттиришни маъқул кўрмоқда.

Жек Грилиш “Астон Вилла” тарбияланувчиси ҳисобланади ва узоқ муддат давомида айнан мана шу жамоанинг асосий юлдузи бўлган. 2021 йилнинг ёзида “Манчестер Сити” уни рекорд сумма – 117,5 миллион евро эвазига ўз сафига қўшиб олди.

Бироқ Хосеп Гвардиола жамоасида ҳужумкор футболчи юқори даражага кўтарила олмади ва футбол жамоатчилиги томонидан ҳамон кўп танқид қилинади.