“Манчестер Юнайтед”дан ҳайдалган Аморимга дарров янги жамоа топилди

Яқинда “Манчестер Юнайтед” раҳбарияти қарори билан бош мураббийлик лавозимидан истеъфога чиқарилган португалиялик мутахассис Рубен Аморим узоқ вақт ишсиз қолмайдиган кўринади.

Англия Премьер-лигасига келишидан аввал “Спортинг”да фаолият юритган мураббий яна Португалия чемпионатига қайтиши кутилмоқда.

Talksport нашри хабарига кўра, “Бенфика” Рубен Аморимни Жозе Моуриньо ўрнига бош мураббийликка асосий номзодлар рўйхатига киритди.

Маълумотларга қараганда, ҳозирги мураббий Жозе Моуриньонинг жамоадаги келажаги ноаниқ. Унинг шартномасида 2026 йил ёзида клубни тарк этиш имконияти борлиги ёзилган.

Агар Моуриньо Португалия миллий терма жамоасини бошқариш таклифини олса, бу банд ишга тушади.

Рубен Аморимнинг ўзи “Бенфика” тарбияланувчиси бўлиб, клубда футболчи сифатида  1994–1998 ва 2008–2017 йиллар ўйнаган. Мураббийлик фаолиятида эса, “Каза Пия”, “Брага” ва “Спортинг”ни бошқарган.