Манчестерликлар футболчиларнинг ёшини “урган”ми?

The Telegraph нашрининг маълум қилишича, “Манчестер Юнайтед” ва “Манчестер Сити” ёш футболчиларнинг ёшини сохталаштириш каби фирибгарликларга қўл урганликда гумонланмоқда.

Манбага кўра, мутасаддилар камида уч футболчи бўйича шубҳаланяпти. Хусусан, улардан иккитасининг номи маълум бўлди.

“Манчестер Юнайтед” 2022 йили 14 ёшгача бўлган жамоага қўшиб олинган ака-ука Бассиру ва Дука Нкотоларнинг ёши “урилган” бўлиши эҳтимоли катта экан. “Манчестер Сити” олган футболчининг номи ошкор қилинмаяпти.

Жаҳон футболида истеъдодли футболчиларнинг ёши кичрайтириб кўрсатилиги кўп учрайдиган ҳолатлардан ҳисобланади. Бунақа вазиятда ёши “урилган” ўйинчилар болалар, ўсмирлар ва ёшлар ўртасидаги мусобақаларда порлаб, кўзга ташланади. Бироқ кейинчалик катта футболга ўтганидан кейин ҳаммаси ҳам ўйнаб кета олмайди.