Турк лигасини ёндирган Шомуродов “Рома”дан нега кетганини айтди
Туркия чемпионатининг янги мавсуми қаҳрамонларидан бири шубҳасиз Элдор Шомуродов бўлди. Ёзда “Рома”дан “Истанбул Башакшеҳир”га кўчиб ўтган 30 ёшли ҳужумчи Суперлиганинг биринчи даврасидан сўнг 17 та учрашувда 12 та гол урган ҳолда тўпурарлар пойгасида пешқадамлик қилмоқда.
Иккинчи давра олдидан Anadolu ахборот агентлиги ўзбекистонлик футболчининг дан интервью олди. Sports.uz портали Шомуродовнинг фикр-мулоҳазаларини ўқувчилар эътиборига ҳавола этади.
Мавсум ҳақида
Мавсумнинг биринчи ярмида айрим қийинчиликларга дуч келдик. Спорт формамиз энг яхши ҳолатда эмас эди. Мавсум бошида кутган натижаларга эриша олмадик, аммо бу ҳолатни тузатиш учун бор кучимизни сарфладик.
Айни пайтга келиб, бизда ҳали ҳам Европа кубокларига чиқиш имконияти бор. “Башакшехир” учун бу мавсумдаги асосий мақсад Европа мусобақаларида иштирок этиш учун йўлланмани қўлга киритишдан иборат.
Шу йўналишда қаттиқ меҳнат қиляпмиз. Ишонаманки, мавсумнинг иккинчи ярмини жуда яхши ўтказамиз ва мақсадларимизга эришамиз.
"Рома"дан “Башакшеҳир”га ўтгани ҳақида
Мен “Башакшеҳир”ни кўпроқ майдонга тушиш учун танладим. Мураббийлар штаби иш услуби ва жамоанинг ўйин услуби менда катта таассурот қолдирди. Ҳозир мен бутун эътиборимни “Башакшехир”га қаратганман.
Лигадаги бошқа жамоалар ҳақида ўйлаб ҳам кўрмадим. Келажакни фақат Аллоҳ билади. Мен жамоага ва Истанбулга кўникиб олдим.
Агар инсон қаттиқ меҳнат қилиб, тўғри йўлдан юрса, Аллоҳ албатта уни мукофотлайди, деб ишонаман.
Нури Шахин ҳақида
Нури Шахин жамоага келган биринчи кунданоқ кўп нарсани ўзгартирди. Уни ҳамма билади. Ишонч билан айта оламанки, Нури Шоҳин билан жамоа анча яхшиланди.
Биз тўғри йўлдамиз, деб ўйлайман. У ҳар бир футболчининг ҳис-туйғуларини ҳам яхши тушунади. Бу биз учун жуда муҳим.
Ички рақобат ҳақида
Жамоамизда кўплаб кучли форвардлар бор. Рақобат жуда қаттиқ. Шунинг учун баъзан турли позицияларда ўйнашимга тўғри келади.
Албатта, “тўққизлик” позициясида ўйнаш ҳам ёқимли, лекин агар “ўнлик”да ҳам майдонга тушиб жамоага фойда келтира олсам, мен учун шунинг ўзи етарли.
Жаҳон чемпионати ҳақида
Биз тарихда биринчи марта жаҳон чемпионатининг финал босқичига йўл олдик. Ҳамма жуда хурсанд бўлди. Чемпионатга жиддий тайёргарлик кўряпмиз.
Энг муҳими — майдонда мамлакатимизга муносиб ўйнаш. Гуруҳдан чиқиш имконияти ҳар доим бор. Биз фақат иштирок этиш билан чекланмаймиз, яхши натижа кўрсатишга ҳам ҳаракат қиламиз. Ўзбекистонга муносиб тарзда ўйнашни мақсад қилганмиз.
Бирлашган Араб Амирликларига қарши ўтказилган тарихий учрашув ҳақида
Бу мен учун энг унутилмас учрашув бўлди. Айнан шу ўйин орқали мен жаҳон чемпионатида иштирок этиш имконига эга бўлдим. Бу ўйин чинакам унутилмас, чунки кўз олдимдан бутун футболчилик фаолиятим ўтиб кетгандек бўлди.
Туркия терма жамоаси ҳақида
Туркия терма жамоаси жуда кучли. Шунинг учун улар албатта жаҳон чемпионатига чиқади. Агар ўз имкониятларини тўлиқ намоён қила олсалар, чемпионатда ҳам яхши натижа кўрсатишларига ишонаман.
Ўзбекистон ҳақида
Ўзбек таомлари турк ошхонасидан қолишмайди. Нафақат таомларимиз, балки Самарқанд, Хива, Бухоро каби тарихий шаҳарларимиз ҳам жуда гўзал. Тошкент ҳам анча ўзгарган, кўплаб чиройли жойлар пайдо бўлган. Шунинг учун Ўзбекистонда кўришга арзийдиган жойлар кўп.
Файзуллаев ва Зеки Челик ҳақида
Аббосбек Файзуллаев, шубҳасиз, Ўзбекистоннинг ёш истеъдодларидан бири. Бошида унга бироз қийин бўлди, лекин ҳозир ўйинини анча яхшилади. Агар шу формасини сақлаб қолса, ажойиб натижаларга эриша олади.
“Рома”да бирга ўйнаган Зеки Челик билан ҳам вақти-вақти билан кўришиб турамиз. Орамиздаги муносабатлар яхши бўлган, жамоада доимо бир-биримизни қўллаб-қувватлаганмиз. “Башакшеҳир”да Зекининг энг яқин дўстларидан бири — Муҳаммад Шенгезер бор, шу сабабли ҳозиргача алоқани узганимиз йўқ.
“Истанбул Башакшеҳир” Туркия чемпионатининг иккинчи даврасини 17 январь куни бошлаб беради. 18-турнинг очиб берадиган учрашувда Элдор Шомуродов жамоаси ўз майдонида “Фотиҳ Карагюмрюк” футболчиларини қабул қилади.
Фикрлар