Манчестерликлар “Реал”нинг бирданига икки футболчисини олиб кетади

“Манчестер Юнайтед” бош мураббийи Рубен Аморим клубдан кетиши керак бўлган ўйинчилар рўйхатини тузиш баробарида уларнинг ўрнига олиб келинадиган янги ижрочиларни ҳам танлашга эътибор қаратяпти. 

Европа матбуотининг ёзишича, манчестерликлар ёзда таркибни кучайтириш учун катта клубларда пишган чарм тўп усталарини олишни мақсад қилган. 

Хусусан, “Манчестер Юнайтед” мутасаддилари жорий мавсум якунланганидан кейин ўз сафига Орельен Тчуамени ва Андрей Лунинни қўшиб олишга ҳаракат қилади. Манчестерликлар “Реал”нинг бу икки ўйинчиси жамоадаги муаммоли нуқталарни бирданига ёпа олишига ишонмоқда. 

Лунин ўтган йили асосий дарвозабон Тибо Куртуа жароҳат олган пайтда маҳоратини кўрсатди. Украиналик посбон шундан бери бошланғич таркибда ўйнашни орзу қилади ва ортиқ захирада ўтирмоқчи эмас. 

Орельен Тчуамени кейинги пайтда кўп танқидга учраяпти. Унинг ўйин даражаси мураббийлар штаби ҳар доим ҳам қониқтираётгани йўқ. 

“Манчестер Юнайтед” ўз режасини амалга ошириш учун “Реал” раҳбарияти бу иккинчи ўйинчини қўйиб юборишга кўнадиган даражада сумма таклиф қилиши кераклигини айтилмоқда.