Манчестерликларнинг қимматбаҳо ўйинчисига харидор топилди

“Манчестер Юнайтед”га трансфер қилинганидан кейин бу жамоа сафида бор маҳоратини юзага чиқара олмаган Мануэль Угарте иш жойини ўзгартириши кутилмоқда.

Нидерландиянинг энг машҳур клубларидан “Аякс” 24 ёшли уругвайлик ярим ҳимоячини Амстердамга олиб кетишга тайёр. Улар бу ўйинчини мавсум охиригача ижарага олиш вариантини кўриб чиқмоқда.

Бу ҳақда Voetbal International хабар берди.

Манба маълумотига кўра, уругвайлик ўйинчининг ўзи ҳам Нидерландия грандига ўтишга қарши эмас, аммо бунинг учун томонлар Угартенинг юқори маоши масаласини ҳал қилиб олиши талаб этилади.

Аввалроқ, Европа матбуоти “Олд Траффорд” етарли даражада ўйин амалиётига эга бўлмаётган футболчига Туркия чемпиони “Галатасарой”дан чорлов бўлаётганини ёзган эди.

Жорий мавсумда уругвайлик футболчи барча мусобақаларда 16 та ўйин ўтказган, аммо самарали ҳаракатлари бўлмаган. Унинг “Манчестер Юнайтед” билан шартномаси 2029 йил ёзигача амал қилади. Transfermarkt маълумотларига кўра, Угартенинг бозор қиймати анча арзонлаган ва бугунги кунда 30 миллион еврони ташкил қилмоқда.