Maoshim kesilsa ham, “Chelsi”dan ketsam bo‘ldi!

Ikki mavsum davomida Angliya futboliga moslasha olmagan “Chelsi” hujumchisi Timo Verner Bundesligaga qaytib ketishni istayapti.

Germaniyalik to‘purar sobiq jamoasi – “Leyptsig” safiga qaytish uchun maoshining teng yarmidan voz kechishga tayyor.

Ma’lumotlarga qaraganda, “Leyptsig” o‘z safida porlagan hujumchini keyinchalik sotib olish huquqi bilan bir mavsumga ijaraga olishga harakat qilmoqda.

Ketma-ket ikki mavsum imkoniyat bergan “aristokratlar” endi 26 yoshli futbolchining ketishiga qarshi emas.

“Chelsi” 2020 yili bu o‘yinchi uchun “Leyptsig” klubiga 53 million evro to‘lagan. Ayni paytda ular germaniyalik hujumchini 39 million evroga baholamoqda.  

Verner o‘tgan mavsumda 37 marta maydonga tushib, o‘n bitta gol va oltita golli pas muallifi bo‘ldi.