Марадонани Зомин билан нима боғлаб туради?

Диего Армандо Марадона! Бу номни дунёда эшитмаган ёки билмаган инсон бўлмаса керак. Футбол оламида машҳурликка эришган аргентиналик “афсунгар”нинг мухлислар шу қадар кўп бўлганки, буни тасаввур қилиш қийин эмас.

Ўзимизда ҳам Марадонанинг ишқибозлари ниҳоятда кўп. Айниқса, ёши катта мухлислар унинг ўйинларини яхши эслашади. Унга шу қадар меҳр қўйишганидан ҳаттоки, ўз фарзандига Марадона исмини қўйганлар ҳам топилади.

Янада энг қизиғи, бизнинг чемпионатда айнан Марадона исмли футболчи ҳам борлигини биласизми? Айнан воҳа томонларда Марадона Сафаров номли профессионал тарзда фаолият олиб бораётган ўйинчи бор. У ҳозирда про-лигада “Зомин” жамоаси аъзоси саналади. Табиати ажойиб, манзарали бўлган Зомин тоғлари уни ўша ерда ушлаб турибди. Мақоламиз қаҳрамони эса дастлаб Марадона исмининг қўйилиш тарихи ҳақида эслар экан, шундай деди:

-  Дадам Диего Марадонанинг ашаддий мухлиси бўлган. 1986 йили ўтказилган жаҳон чемпионатида Аргентина ҳамда Марадонанинг ўйинларини телевизор орқали томоша қилиб, ўзининг ёқтирган футболчисига мухлислик қилган. Шу тариқа, ўғил кўрсам, исмини Марадона қўяман, деб ният қилган ва менга шундай ном берган.

Хўш, ўзбек Марадонасининг футболга кириб келиши қандай бошланган? У аввало қаерда сабоқ олган? Буни қарангки, ўз вақтида у Элдор Шомуродов билан Москванинг “Локомотив” клубида кўрикда бўлганини ҳам эслади. Бу борада аргентиналикнинг адаши қуйидагиларни айтди:

-  2006 йилдан “Машъал” академиясида илк қадамларимни бошлаганман. Биринчи мураббийимиз Отажон Авезов бўлган. Биласизми, 2008 йили мен, Элдор Шомуродов ва Жаҳонгир Абдумўминов учаламиз Москванинг “Локомотив” клубида кўрикда бўлганмиз. Аммо ўшанда бизларни у ерда олиб қолишмаганди. 2011 йилда эса биринчи лигада “Машъал” жамоасига ўтдим. Шундай қилиб, катта футболга аста-секин кириб келдим.

Кўриб турганингиздек, Марадона катта футболга “Машъал” клуби орқали кириб келди. Бироқ ҳақиқий Марадона сингари ва унинг исмига мос равишда фаолияти ҳозирча ўзи кутгандек ёрқин кўриниш олмаяпти. Нега, Сафаров ярқ этиб порлаб кета олмаяпти? 26 ёшли ҳужумкор футболчи эса бунинг сабабларини ҳам айтди.

-  2017 йилда “Машъал” билан уч йилга мўлжалланган шартнома тузгандим. У ерда бошида мен учун ҳаммаси яхши эди. Чемпионат учрашувларида камроқ майдонга тушардим. Аммо Кубок баҳсларида тўлақонли равишда ўйин амалиётига эга бўлиб борардим. Ўша 2017 йилнинг иккинчи даврасида эса мени “Шўртан” жамоасига ижарага бериб юборишди. Тўғриси, шундан сўнг фаолиятимда пасайиш юзага кела бошлади. Мени фақат ижарада ўйнатишди. Энди эса айнан шу йили шартномам тугади ва эркин агент сифатида  Жиззахнинг “Зомин” жамоаси билан шартнома туздим. Шунингдек, бунгача ҳам ижара асосида “Динамо” ва “Шердор” жамоаларида тўп сурдим.

Шунга қарамай, унинг ҳам ўзига яраша орзу ва мақсадлари йўқ эмас. Биз билан мулоқот чоғида шу ҳақида ҳам тўхталди.

-  Ҳамма футболчилар қатори менинг ниятим ҳам Суперлигада ўйнаш. Шу билан бирга албатта Ўзбекистон миллий терма жамоасида ҳам тўп суришни хоҳлайман. Тўғри, ҳозирги ҳолатимда, боз устига про-лигада ўйнаётган футболчининг миллий термада тўп суришни орзу қилиши бироз кулгули ёки ақлбовар қилмас ишдир. Лекин орзу қилишнинг айби йўқ.

Ўз навбатида Марадона кимларга ҳавас қилади ёки кумири борми? Хуллас, ўзи ўрнак оладиган футболчиси хусусида гап борар экан, бу борада Роналдуни алоҳида таъкидлади.

-  Аслида менинг кумирим йўқ. Бироқ Криштиану Роналдунинг ашаддий мухлисиман. У ҳақиқий чемпион! Шунингдек, Неймарнинг ҳам ўйинлари менга ёқади. Ўзимиздан эса Жалолиддин Машариповнинг ўйинларини ёқтираман. У ҳозирда ўзининг юқори чўққисига чиққан. Машариповни тўхтатиш қийин.