Мареска: "Агар катта жамоа бўлмоқчи бўлсак, баъзан "хунук" ғалабаларни ҳам қўлга киритишимиз зарур"

"Челси" бош мураббийи Энцо Мареска жамоасининг "Тоттенхэм" устидан қозонган 1:0 ҳисобидаги ғалабасини таҳлил қилди.

"Натижа муҳим, чунки мавсум якунланиш арафасида турибмиз. Шу билан бирга, биз хоҳлаган услубда ўйнаб, ғалаба қозонишга интиламиз. Бугун баъзи паллаларда жамоамиз жуда яхши ҳаракат қилди. Ҳар доим ҳам ўйин шундай тугашини истамаймиз. Агар катта жамоа бўлишни истасак, баъзан "хунук" ғалабаларни ҳам қўлга киритишимиз керак. Шунинг учун мен натижадан қониқдим."

Мареска жамоасининг ўйинига ҳам тўхталиб ўтди:

"Жами олганда, жуда яхши ўйин ўтказдик. Ғалабага лойиқ эдик ва биринчи бўлимдаёқ бир неча яхши вазиятлар яратдик. Охирги 10 дақиқада эса жамоа жипслик, ирода ва характер кўрсатди. Айнан шу нарсалар бизга керак."

Шунингдек, мураббий жамоанинг ўсиши ва мақсадлари ҳақида гапирди:

"Албатта, натижалар нуқтаи назаридан асосий мақсад – Чемпионлар лигаси йўлланмаси. Лекин шахсан мен жамоанинг кун сайин ўсиб бораётганини кузатишга кўпроқ эътибор қаратаман. Биринчи кундан бери жамоа доимий равишда яхшиланиб боряпти" - дея таъриф бериб ўтди "аристократлар" мураббийи.