Markaziy o‘yin Samarqandda, Olmaliqda derbi va "Navbahor" Navoiyga safari

Bugun Superliga 13-tur o‘yinlari start oladi. Kun doirasidan 3 ta uchrashuv o‘rin olgan. 28 iyun kungi bahslarning eng markaziy bahsi Samarqandda kechadi. Olmaliqda derbi va yangi murabbiy qo‘l ostida "Navbahor" Navoiyda mehmon bo‘ladi.

Samarqandda noxush seriyaga barham berilamidi?

Davron Fayziev shogirdlari o‘z uylarida mag‘lubiyat nimaligini bilmay kelmoqda. Mezbonlar "Nasaf" va "Navbahor"dan ochko olishdi. O‘zbekiston chempioni "Lokomotiv" taslim etildi. Ushbu mag‘lubiyatdan so‘ng "temiryo‘lchilar" murabbiylari iste’foga chiqarildi. Bu natijalar o‘z-o‘zidan Samarqandda o‘yinlar oson bo‘lmasligini ko‘rsatmoqda. Ushbu jamoalar o‘rtasidagi bellashuvlarda "qaldirg‘ochlar" ustunlik qilishmoqda. Ular Samarqandda umuman yutqazishmagan. Shu bois o‘yinning ahamiyati katta. "Dinamo" bugun ushbu an’anani buzish uchun kurashsa, Vadim Abramov shogirdlari o‘tgan turdagi mag‘lubiyat tasodif ekanligini ko‘rsatish uchun kurashishadi.

Imkoniyatlar: 50% - 50%

Olmaliqda derbi

AGMK o‘z maydonida "Metallurg"ni qabul qiladi. Ushbu uchrashuv Toshkent viloyati derbisi hisoblanadi. Ushbu ikki jamoa turnir jadvalida ketma-ket o‘rinlarni egallab turibdi. Bekobodliklar oxirgi o‘yinlarda duranglar iskanchasida qolib ketgan bo‘lsa, Mirjalol Qosimov shogirdlari vodiyning ikki klubidan 4 ochko oldi. Bu qaysidir manoda olmaliqliklarning uyg‘anayotganidan darak deyishimiz mumkin. Chunki AGMK o‘z oldiga yuksak maqsadlar qo‘ygan "Navbahor"ni oxirgi daqiqalarda g‘alabadan mosuvo qildi. Andijonda esa zafar quchdi.

Ko‘rib turganingizdek, bugun o‘ziga kelayotgan AGMK va o‘yini va natijalari pasayayotgan "Metallurg" ishtirokida derbi o‘tkaziladi.

Imkoniyatlar: 55% - 45%

Yangi murabbiyning debyuti

Xabaringiz bor, bir necha kun avval "Navbahor" klubi bosh murabbiyi Andrey Kanchelskis o‘z lavozimidan ozod etilib, o‘rniga Deyan Jurjevich tayinlandi. Ushbu mutaxassis ilk o‘yinini Navoiyda "Qizilqum"ga qarshi o‘tkazadi. Bu uchrashuvdan avval ko‘pchilik mehmonlarning imkoniyatini biroz yuqori baholab, murabbiyning debyuti omadli chiqishiga ishonmoqda. To‘g‘ri, "Qizilqum" "Navbahor" kabi grand jamoa emas. Lekin bu jamoa har xil holatda turli xil natijalar qayd etishi mumkin. "Lochinlar" raqibni mensimay maydonga tushishsa, qiynalib qolishlari hech gap emas. Qolaversa, Elguja yaxshi formada bo‘lsa, jamoaga katta foydasi tegadi. Biroq namanganliklar yo‘qotilgan ochkolari ko‘pligi bois bu bellashuvga boshqacha kayfiyatda yondashishi aniq.

Imkoniyatlar: 40% - 60%