Марказий ўйин Самарқандда, Олмалиқда дерби ва "Навбаҳор"нинг Навоийга сафари

Бугун Суперлига 13-тур ўйинлари старт олади. Кун доирасидан 3 та учрашув ўрин олган. 28 июнь кунги баҳсларнинг энг марказий баҳси Самарқандда кечади. Олмалиқда дерби ва янги мураббий қўл остида "Навбаҳор" Навоийда меҳмон бўлади.

Самарқандда нохуш серияга барҳам бериламиди?

Даврон Файзиев шогирдлари ўз уйларида мағлубият нималигини билмай келмоқда. Мезбонлар "Насаф" ва "Навбаҳор"дан очко олишди. Ўзбекистон чемпиони "Локомотив" таслим этилди. Ушбу мағлубиятдан сўнг "темирйўлчилар" мураббийлари истеъфога чиқарилди. Бу натижалар ўз-ўзидан Самарқандда ўйинлар осон бўлмаслигини кўрсатмоқда. Ушбу жамоалар ўртасидаги беллашувларда "қалдирғочлар" устунлик қилишмоқда. Улар Самарқандда умуман ютқазишмаган. Шу боис ўйиннинг аҳамияти катта. "Динамо" бугун ушбу анъанани бузиш учун курашса, Вадим Абрамов шогирдлари ўтган турдаги мағлубият тасодиф эканлигини кўрсатиш учун курашишади.

Имкониятлар: 50% - 50%

Олмалиқда дерби

АГМК ўз майдонида "Металлург"ни қабул қилади. Ушбу учрашув Тошкент вилояти дербиси ҳисобланади. Ушбу икки жамоа турнир жадвалида кетма-кет ўринларни эгаллаб турибди. Бекободликлар охирги ўйинларда дуранглар исканчасида қолиб кетган бўлса, Миржалол Қосимов шогирдлари водийнинг икки клубидан 4 очко олди. Бу қайсидир манода олмалиқликларнинг уйғанаётганидан дарак дейишимиз мумкин. Чунки АГМК ўз олдига юксак мақсадлар қўйган "Навбаҳор"ни охирги дақиқаларда ғалабадан мосуво қилди. Андижонда эса зафар қучди.

Кўриб турганингиздек, бугун ўзига келаётган АГМК ва ўйини ва натижалари пасаяётган "Металлург" иштирокида дерби ўтказилади.

Имкониятлар: 55% - 45%

Янги мураббийнинг дебюти

Хабарингиз бор, бир неча кун аввал "Навбаҳор" клуби бош мураббийи Андрей Канчельскис ўз лавозимидан озод этилиб, ўрнига Деян Журжевич тайинланди. Ушбу мутахассис илк ўйинини Навоийда "Қизилқум"га қарши ўтказади. Бу учрашувдан аввал кўпчилик меҳмонларнинг имкониятини бироз юқори баҳолаб, мураббийнинг дебюти омадли чиқишига ишонмоқда. Тўғри, "Қизилқум" "Навбаҳор" каби гранд жамоа эмас. Лекин бу жамоа ҳар хил ҳолатда турли хил натижалар қайд этиши мумкин. "Лочинлар" рақибни менсимай майдонга тушишса, қийналиб қолишлари ҳеч гап эмас. Қолаверса, Элгужа яхши формада бўлса, жамоага катта фойдаси тегади. Бироқ наманганликлар йўқотилган очколари кўплиги боис бу беллашувга бошқача кайфиятда ёндашиши аниқ.

Имкониятлар: 40% - 60%