Марко Станоевич: "Таклиф бор, аммо "Насаф"нинг қарорини кутяпман"

“Насаф” клуби ўз етакчилари билан шартномаларни узайтираётганидан воқиф бўлсангиз керак-а? Бу хусусида сайтимиз орқали ҳам маълумотлар бериб боряпмиз. Бироқ ҳали келишув узайтирилмаган, аммо маҳоратли ҳисобланган футболчилар ҳам бор.

Сербиялик ярим ҳимоячи Марко Станоевич бир неча йиллардан бери “Аждарлар” шарафини муносиб ҳимоя қилиб келмоқда. Лекин орада жиддий жароҳат олди. Шунга қарамай, соғайиб яна сафга қайта олди. У жорий йилги мавсумда 19 та ўйинда 2 та гол урди. Хўш, Марко Станоевич “Насаф”да қоладими ёки клубини ўзгартирадими?

Қуйида Sports.uz журналистининг сербиялик легионер билан суҳбатини ўқишингиз мумкин.

- Марко, “Насаф” билан шартномангиз якунига етдими? Жамоа билан хайрлашдингизми?

- Биласизми, мени “Насаф” жамоаси билан тузган шартномам 31 декабргача. Ҳозирги пайтда уйда хордиқ чиқаряпман.

- Клубдагилар билан келажагингиз ҳақида гаплашганмисиз?

- Албатта, клуб президенти ва директори билан гаплашдик. Улар мени клубга керак эканлигимни айтишди. Лекин ўша гапни эшитганимдан кейин барчаси шу ҳолатда турибди. Охирги учрашувдан кейин менга ҳеч ким қўнғироқ қилмади. Айтганимдек, ҳозир уйда дам оляпман ва клубнинг қарорини кутиб турибман.

- Сир бўлмаса, сизда қандай таклифлар бор?

- Таклиф бўлди. Аммо мен ҳаммага ҳали яна “Насаф”да тўп суришим мумкинлигини, жамоа раҳбарияти билан гаплашиш кераклигини айтдим. Агар “Насаф” бизга керак эмасман деб айтадиган бўлса, шунда бошқа клублар ҳақида ўйлаб кўришим мумкин.

- “Насаф” бир қатор футболчилар билан шартномаларни узайтирмоқда. Кузатаётгандирсиз?

- Ҳа, мен ўйинчилар билан алоқадаман. Кўплаб футболчиларнинг жамоада қолаётгани яхши. Бу “Насаф” учун ижобий. Кенжабоев қайтганидан хурсандман.

- Нима бўлганда ҳам Ўзбекистон чемпионатида қолмоқчимисиз ёки муҳитни ўзгартирасизми?

- Мен ҳозирча “Насаф”дан ташқари бошқа вариантлар ҳақида ҳеч нарса ўйламадим. Клуб раҳбарияти қандай муносабат билдиришига қараб кейин бошқа режа қилишим мумкин.

- “Пахтакор” ҳар йили чемпион бўляпти. Сиз буни қандай изоҳлайсиз?

- “Пахтакор” клуби катта анъаналарга ва катта тажрибага эга бўлган жамоа. Тажрибали футболчилари клубда қолди. Улар барқарор ўйин кўрсатишди. Маҳорати билан ғалабалар қозонди.

- Агар сизга “Пахтакор”дан таклиф бўлса, бунга рози бўласизми?

- Дастлаб қизиқиб кўришганди. Кейин шу билан тўхтаб қолишган.

- Бу йил сизга ҳаммадан кўра кўпроқ нима ёқди?

- Бу йил мен учун ўзгача бўлди. Жароҳатдан сўнг майдонга қайтдим ва “Насаф”га ёрдам бердим. Айтишим мумкинки, ушбу мавсум анча самарали бўлди. Охирги 4 йилга қараганда “Насаф”даги бу йилги фаолиятим анча самарали тарзда ўтди.

Шуҳратбек Жўраев.