Марсело Неймарнинг ЖЧ-2026га чақирилганига ҳиссиётли муносабат билдирди

“Реал” ва Бразилия терма жамоасининг собиқ ҳимоячиси Марсело Неймарнинг Жаҳон чемпионати-2026 учун терма жамоага чақирилганидан катта хурсанд бўлди.

“Сантос” ҳужумчиси Карло Анчелотти эълон қилган якуний таркибдан жой олди. Неймар 2023 йилдан бери жароҳатлар сабаб миллий жамоада ўйнамаётган эди.

Марсело ижтимоий тармоқда таркиб эълон қилинган видеони жойлади. Неймарнинг номи экранда пайдо бўлиши билан собиқ футболчи қувончдан бақира бошлади, муштини силкитиб, жойида сакради.

"Олға, Неймар! Бразилия, олға — 6-чемпионлик учун!

Раҳмат, мистер Анчелотти", — деб ёзди Марсело.

Эслатиб ўтамиз, Марсело ва Карло Анчелотти аввал “Реал”да бирга фаолият олиб борган.